王君馨婚后好甜蜜　钟意俾老公揽住洗碗

撰文： 冼燕珊
出版：更新：

王君馨今日出席TVB剧集《性在有情》宣传活动，嚟紧系君馨婚后第一个情人节，唔知佢同老公Daniel点庆祝呢？“我哋都钟意煮嘢食，又唔想出街同人迫，所以打算留喺屋企两个人煮下嘢食。”问到Grace多唔多下厨，佢就话唔多，同埋自己唔钟意洗碗，除非呢个情况:“如果我揽住佢，或者佢揽住我，一齐倾吓计，互相陪住大家，咁就好乐意洗碗喇。”真系好鬼Sweet呀！

君馨话自己唔多钟意洗碗，但俾老公揽住，一齐倾吓计就唔同讲法。（网上图片）
君馨今日出席剧集《性在有情》宣传活动。（江智骞摄）

唔讲唔知，原来君馨同老公拍拖12年以来，上年先第一次一齐过情人节，佢话有次老公带咗两个大喼嚟香港，仲谂住佢男人老狗，做咩带咁多衫返嚟，原来其中一个喼装咗一只巨型毛公仔，令君馨非常惊喜。讲到维持婚姻之道，君馨就话：“会去下旅行，过啲二人世界，问下对方嘅感受，了解吓自己仲可以点样做得好啲，而唔系结完婚就咩都唔理，大安旨意觉得咁样就可以一生一世。”