【反黑】下架三个月后登陆Netflix　导演宋本中：4K拍摄只系基本

去年一套《反黑》，掀起大批网友追睇，不过去年10月尾大结局播出后忽然宣布24小时内会下架，网友大惊失色纷纷不眠不休追进度。事隔三个月大家终于可以再睇啦，而且仲冲出国际成为首部香港兼粤语剧集登陆Netflix，认真威水﹗导演宋本中接受香港01访问时就话：“佢地要求真系好高，4K拍摄只系基本。”

【反黑】播完大结局24小时内下架　未追晒点算好？【反黑】招积演技获认同　张建声︰《向西》都花3个月去整颓自己

Netfelix呢日宣布《反黑》会喺2月5日上架，令网友感到相当惊喜，导演宋本中接受香港01访问时，都难掩兴奋心情：“又点止系首套香港兼粤语剧集登陆Netflix，大家都应该知道佢地把关好严，喺其他平台播过一集都唔会要。呢次系Netflix开咗之后，第一次，有剧集喺Youtube播晒再喺度上架﹗今次除咗有英文字幕，仲会有日文、韩文、西班牙文字幕都有，会喺195个地区发布。”

宋本中表示呢次重新上架，Netflix版同之前大家睇嘅版本基本上系完全一样，只系微调咗少量犯驳位，即系啲血腥缝嘴情节全部都睇得番。大家都知道Netflix睇得上眼嘅作品都好高质，宋本中都有透露个中要求：“佢地要求真系好高，4K拍摄只系基本。上架事少，嚟紧第二季同埋其他项目，系用咩身份去合作。基本上一定要系荷里活电影公会认证嘅演职人员拍摄，先可以合作到，所以今次真系为港争光架。”

而呢次第一季上架只系个开始，宋本中话嚟紧仲会有大量多方面合作：“嚟紧新年前会有个全球多媒体发布会，唔单止系公布第二季拍摄，仲有多方面涉及到唔同年龄层嘅发展，只可以透露其中一项，会系同一个世界国宝级游戏会Crossover。”《反黑》中饰演招积令人气急升嘅张建声亦表示：“感谢各位观众支持才能把《反黑》冲出香港，迈向国际，这个奇迹全靠每一个有收看过《反黑》的“你”。而“招积”的复仇大计亦向全球蔓延中⋯”