【旅行青蛙】山寨版养蛙变芒亨劲崩溃　赶潮流下载发觉中伏

“你只仔返屋企未呀？”“今日储到几多块叶？”，呢几日办公室充斥住互相问候嘅语句，女同事个个变晒慈母一样，日盼夜盼阿仔几时返归。佢地其实只系玩紧最紧Hit爆嘅日本手机游戏《旅行青蛙》（旅かえる），呢只Game好就好在其实唔使点玩，唔会花太多时间，令到男同事们R晒头唔明白点解会沉默，默默走去下载试玩，点知，就中伏啦﹗

由于《旅行青蛙》（旅かえる）暂时只得日文版，唔识睇嘅朋友仔除咗睇攻略，都系得闲去APP STORE睇下官方几时出中文版。有男同事下载完之后话：“有得打下怪物都几好玩呀﹗好似芒亨呀。”打怪物？芒亨？下？望一望佢嘅版面先发觉，原来下载咗山寨版青蛙。

正版青蛙被称为“佛系放置Game”，因为玩家喺游戏中只有四样野可以做：为青蛙执拾行装，放置桌面、收割三叶草（可换取青蛙旅行所需的食物和道具）和招待青蛙嘅朋友。不过呢只山寨版《旅行蛙の青蛙旅行家》，除咗icon都系一只青蛙，个名又好似之外，玩法完全系南辕北辙。

正版并不含竞技、任务和互动成分，只要等时间过去收割三叶草，帮青蛙准备食物同道具就可以，而山寨版要不断屠龙赚取四叶草，成件事真系血腥兼忙得多；另外介面上两款都相当似，未使屠龙之前真系好易被骗，不过大家只要认住日文先啱，事关官方未有中文版推出，简体字就一定系山寨版嚟架啦。