【平安谷】龚嘉欣被刘江疯狂打：我嘅眼泪即刻飙出嚟！

首播第一个星期就有25.6点收视嘅TVB剧集《平安谷之诡谷传说》，有咁好成绩有部分原因，应该系因为刘江喺戏中会疯狂打一班女演员，睇到唔少观众劲肉紧！而昨晚剧情就讲到刘江发现自己之前中毒，原来龚嘉欣才是原凶，佢仲系大庭广众之下被刘江怒打，之后仲要被逐出家族，仲要同宝贝仔被逼分离。龚嘉欣昨晚出席台庆颁奖礼庆功宴接受《香港01》访问时就透露，“𠮶阵又用石仔、鞋咁掷我，虽然系道具，但系咁远掷过嚟，真系有啲痛。”相信有好多观众睇完都好肉赤！

咁样俾人打话唔痛就呃你嘅，龚嘉欣就指当时拍呢场戏之前都同刘江讲，“你真系打落我度啦，我想做得真啲。点知一roll机，我嘅眼泪即刻飙出嚟。”其后记者问到系咪已经系套戏打得最劲？龚嘉欣即刻流露出一副奸笑样，“我话俾你听，唔系呀！刘老师仲有无尽咁继续衰落去，佢真系好衰㗎！”睇嚟，刘江继“讲呢啲”之后好快又有新潜力图出现喇！