台庆临时被弹钟今年再邀请　罗嘉良“不了”专心大陆拍剧

乐坛成绩表已经派晒，嚟紧嘅就差下周日（21/1）嘅台庆颁奖礼，听讲今次《降魔的》呼声最高，究竟会系马国明大热跑出，定系王浩信实力取胜呢？边个赢就仲未知，但赛前就好多花边新闻出现，好似今日就有报导指大台邀请咗罗嘉良出席颁奖礼，皆因佢套《与谍同谋》入选咗男主角奖，但啱啱都讲应该系王浩信同马国明之争，咁罗嘉良出席咪好尴尬？

其实仲尴尬嘅事都仲有，事源上年大台搞《万千星辉贺台庆》嘅时候，已经邀请过罗嘉良出席，但事情搞得唔系几愉快。听讲𠮶阵罗嘉良要同个囝庆祝生日，订晒机票，但大台就应该会补返笔钱畀罗嘉良取消机票同香港嘅车马费，但就有传因为𠮶笔钱要几万蚊，大台就唔想畀，所以就突然取消叫罗嘉良唔使嚟。哗，你叫我嚟就嚟，叫我走就走，咁咪好冇面，罗嘉良对大台心都淡晒。

点知隔咗半年都冇，有传大台又邀请罗嘉良去颁奖礼，所以有媒体都揾咗罗嘉良问清楚，佢都好大方话如果有时间嘅都会出席，但因为赶住拍剧，分身不暇嚟唔到，其实见过鬼都怕黑，一阵又弹钟真系“瘀”到爆炸。