【Friends】神剧无限loop　 23年后再翻煲《Friends》

圣诞在家食番餐鸡煲聚一聚，为了应节，于自选影院拣咗套《Office Christmas Party》嚟睇，见到大茄Jennifer Aniston，朋友随口叹了句：“哗，乜佢变得咁老！”Excuse Me!!!知唔知全盛时期的Jennifer有几索？咁讲有冇顾及《Friends》忠粉感受？睇《Friends》大如我，珍姐和其他五位主角是永垂不朽的！冇错，一啲冇夸张，有一种剧，无论隔几多年，就系永垂不朽.......讲咁耐，其实想提提你，英美Netflix一早有得任睇十季的《Friends》，今年终于、终于、终于轮到在香港Netflix上线。

94年启播，04年大结局，打后试过买VCD储、上过内地网下载、这些年又深夜在Now 的华纳电视断断续续追过，重温冇十次都有八次。《Friends》对好多人嚟讲，其实似睇金庸，更似周星驰电影，一样系桥段笑位甚至对白都已经识背，见亲都硬系要掀多次、唔舍得转台，今次有得喺电子平台一次过由头煲到尾，又系另一种层次同享受。感谢主，科技进步，爱煲剧的人有福了。

识煲梗系煲美剧，点解新剧大把选择、大把潜力股成为新经典，系要拣套廿年前的来重温？首先，经典不能不识。点解每季开播甚至每次重播收视都能高开、点解艾美金球年年提名攞奖、大结局成为美国史上最多观众电视大结局第五位、仲有点解六位主角由第一季每集2万5美金酬劳加到最后两季每集100万美金、点解《老友记》唔止系一套剧仲成为一种文化，唔睇你又点知？

再者，虽则是廿多年前播出旧剧，不用担心有代沟。笑位依然密集好笑、不论友情爱情定生活职场，其实去到任何年代要面对受困扰都系𠮶几味：梦想要追帐单都要找、眼前劳劳碌碌营营役役的又系唔系当真自己想要？错过了的爱情仲追唔追得番？当友情升温变爱情，是该勇敢去爱定留在安全线上万无一失？个人嚟讲，番睇再多次，第三季见到Ross同Rachel倾到天光依然得出分手结论，还是次次都会觉得赤......因为似曾相识......啰！当然，观看过程中你总会见到call机、walkman、同识女仔仲要写个固网电话号码落张酒吧纸巾度，无伤大雅，因为科技再进步，人性，就是人性。

然后，即使Rachel、Monica、Phoebe、Joey、Ross同Chandler的六人行已经够照，当年当扎、如今已经升上神台的串星还是不定时出现包保见到会哗哗声：出炉金球影帝Gary Oldman喷到Joey成面口水、《怪奇物语》神化阿妈Winona Ryder同Rachel玩过She She、Julia Roberts嘴完Chandler原来系为咗玩报复、Bruce Willis系Ross小女友的恶老窦、George Clooney由《ER》穿越咗去《Friends》睇症、蚁侠Paul Rudd同Phoebe结咗婚、回不去了睇番会挂念的Robin Williams，当然当然，仲有那些年仲系Jennifer老公、晒完恩爱无耐就出轨挞着Angelina Jolie的Brad Pitt.......太多太多、不能尽录，于其话系彩蛋，其实缤纷过放烟花。

至于拍完《Friends》六大主角的去向和发展，除了Jennifer做过吓荷里活爱情片女王外，其他几个的确发展一般般，新剧新角色都硬系俾人话脱离唔到旧经典、新瓶旧酒表演无厘新意㖞......鬼咩！《Friends》成功过头、入肉得滞，有错咩？当廿年后，Lady GaGa见到珍姐都系话Ross and Rachel系神级CP、《权力游戏》女主角Emilia Clarke见到Matt LeBlanc都系希望Joey当住佢面讲一句“How you do'in”，你估经典本人唔觉闷嘅咩？