【后生仔倾吓偈】借醉“执尸”系犯法　麦明诗提醒：同相熟朋友玩

今集《后生仔倾吓偈》继续系讲“狗公”，狗公通常都系被大家感觉净系识死Chur女神，疯狂炸Whatsapp，但原来唔止咁。大学生们就分享经验话曾经被狗公抽水，甚至有人试过被狗公灌醉酒，最后仲借机行“凶”，估唔到依家大学生嘅尺度相当大。喺呢个时候读过法律嘅10A麦明诗就同各位女仔解释一下，原来“执尸”系犯法嘅：“喺法律角度如果佢醉到不省人事，而你上咗佢呢，其实系强奸嚟，因为佢畀唔到佢嘅同意你。”麦明诗重申：“Drunken consent is still a consent”，见大家听完都唔系好明，佢就解释：“即系你醉咗就会同意去做一啲你平时唔会做嘅事，但你唔可以赖你𠮶个同意唔系一个同意。但如果你醉到不省人事，你冇任何身体上意识或者讲到嘢去显示你嘅同意，咁就唔系一个同意。”

身为港姐冠军嘅麦明诗当然就有被“狗公”骚扰过嘅经验，佢话啱啱读大学迎生𠮶时有一个好尴尬嘅回忆：“之前有一种手机叫“BB”，而家好少人用，𠮶阵一系BB一系用苹果，我同佢讲咦你用BB嘅，咁𠮶阵系我隔住条裤估嘅，佢就话你咁都睇到，你咪睇到我嘅XX。”呢段对话相当有调情意味，但后尾饭局完个男仔竟然同麦明诗讲：“By the way，呢个我女朋友。”Louisa就话相当尴尬啊，跟住大学生就笑佢系自作多情，佢即刻反撃：“都唔可以咁讲，佢之后都有追我嘅，3年之后。”咦，掐指一算，唔知麦明诗讲𠮶个系咪阿林生呢？

事后就揾到麦明诗亲身回应执尸到底系咪等于强奸呢？Louisa可能因为之前被网民炮轰一事有阴影，佢利申自己唔系律师，仲引用咗港大社区法网去引证自己嘅讲法，如果大家睇完觉得好惊讶，咁可能系大家对保护自己嘅意识不足喇，Louisa最后提醒大家：“同啲相熟朋友去玩，不过就算相熟嘅朋友都唔可以完全放低戒心。”