【后生仔倾吓偈】麦明诗认会讲粗口　曾对住妈妈讲：关你X事

年轻人之间嘅对话，少不免会夹杂粗口，其实不带恶意只为顺口，不过如果系公众人物讲粗口，就好易被闹教坏细路。冯盈盈参选港姐时，被挖出Facebook上有唔少写晒粗口闹政府嘅留言，被网民封为“粗口港姐冠军”。估唔到另一位品学兼优嘅十优港姐麦明诗，都有讲粗口架噃﹗佢喺J2节目《后生仔倾吓偈》中，自爆曾经对住妈妈讲：“关我X事”令麦妈妈即时发火呀！

新一集《后生仔倾吓偈》中，研究讲粗口文化，在场KOL几乎人人都有讲，觉得助语、闹人同样适用。估唔到品学兼优嘅麦明诗都觉得粗言秽语若然用得其所，并无大碍：“我觉得其实粗口系一个学问，有几个层次，有啲系形容词有啲系名词，有啲系用嚟表达愤怒情绪。我觉得愤怒时唔应该再用一啲词语去加附愤怒，或迁怒于人。但系对事对自己，或者形容一啲事，有时候真系好难用另一个字去代替，其实系词穷嘅表现。”睇嚟Louisa都好有研究㖞！

Louisa话自己有时会讲粗口不过唔多，亦一定会睇场合收俭，不过就曾经试过喺妈妈面前不慎“爆粗”，搞出掀然大波：“有次同妈咪热烈地沟通时，唔小心讲咗一只字粗口（边只字呀？），关你X事，其实真系冲口而出顺口讲咗出嚟，妈咪即刻好嬲好严肃，问我点解要用粗口闹佢，搞到我即刻不停解释，唔系要闹佢，只系唔小心用咗一个粗口字去做连接词。”

讲粗口有时系口快快，Louisa仲试过手快快，覆网民留言时想揿心心，唔小心揿错隔篱𠮶个中指图，send咗5个中指出去回复，inbox又无得删除，只能即刻同佢道歉话揿错咗，再传返10个心心补偿。