《到此一游》林师杰同黄心颖拍亲热镜头超紧张：招架唔住！

无线剧集《降魔的》大受欢迎，由胡鸿钧主唱的主题曲《到此一游》亦唱到街知巷闻，TVB即刻食住个势，推出了由冯盈盈、黄心颖、蔡思贝、张宝儿以及邵珮诗合唱的小花Version，日前于官方facebook发布之后，获得网民热烈的反应。MV的主角当然是5个靓女啦，不过其实仲有两位男艺人有份演出，就是周志康同林师杰喇。

两人都分别分饰了两角，一是负责扮丧尸，成个样都被特技化妆遮晒，根本看不到他们是边个。另外个角色就可以用返自己个靓仔样示人，周志康出镜的次数都几多㗎，可以清楚睇到是他。反观林师杰饰演的型仔纹身师就完全见不到样，就算半裸爆肌上阵，都只系见到他的手臂同背脊，唔讲真系唔会知是他啰。

有网民就觉得林师杰今次在MV入面零存在感，仲惨过坤哥做棋，好戥他唔抵呀！香港01记者就访问了师杰，问问他到底有无因此而唔开心，他说：“唔会唔开心，公司有大project自己都好想参与，我好雀跃一口答应㗎。入行咁耐都未有机会试特技化妆，化咗4个钟，其实唔算辛苦，因为jacky（化妆）团队好照顾我哋，每个step讲得好清楚，几时喷眼，口，鼻都会先通知先喷，好体贴。收工仲特意留多一个钟帮我哋落妆，硬性要我地敷咗mask先俾上车。”

化妆化成4个钟都咪话唔辛苦，不过师杰觉得辛苦之处是拍摄当日得13度，而他要半裸坐足4个钟：“辛苦系辛苦在于当日好冻，真系要赤膊坐系度4个钟，得闲又要喷啲液体上身。同埋周志康之前有工作，佢嚟到先食饭，我仲要等埋佢食完，所以我上妆时间多过佢两个钟。”首次扮丧尸的他仲好开心添：“戴住个面具感觉好free，同埋第一次用肢体去演绎一堆嘢。其实我哋拍多咗好多嘢，喺背后，无剪到出嚟嘅。但系可以做丧尸准备去杀人感觉好正，真系试咗一样好唔同嘅东西，成个过程好开心。”

而势估不到，成个拍摄过程令师杰觉得最辛苦，竟然是要同心颖拍的亲热镜头：“因为原来我无拍过好多亲密戏份，𠮶晚我同心颖拍咗个几钟，唔系好耐，不过我真系未试过拍几个Shot拍到咁攰，超紧张，个心跳得好快，跳到个人觉得有啲唔舒服。𠮶晚咁啱我撞咗工作，系做做下嘢特登冲过去拍一阵，赶到都无时间食饭，咁心颖咁性感咁靓，唔食饱饭无可能招架得住㗎嘛，所以𠮶晚拍到好攰。”