【溏心风暴3】收视愈来愈低　证明观众已厌倦八婆式嗌交

重头台庆剧《溏心风暴3》进入第二周，估唔到收视继续低迷，只得21.5点，呢个数综合，翡翠台电视收视包括模拟频道、数码频道 (81 台) 及 myTV SUPER (机顶盒、APP、web)的直播及 24 小时内追看之收视，简单嚟讲即系计哂，冇得抵赖，而上周22.2点，即系再跌0.7，如果形势不变，真系有机跌破２０点，溏心第一、二辑平均收视过30点，相信TVB都觉得第三辑会高收，但点解会咁差呢？原因就系观众进步咗，但TVB无啰！

溏心第二辑是2008年，９年后今日再拍第三辑，演员又系夏雨、司祺姐等，首先演员绝对不是收视差原因，几位老戏骨，真系有几多俾哂你，连潮语都学埋，仲想点？最大问题系剧本，曾经谂过系咪观众对争产剧、争嘢唔敢兴趣呢？唔系㖞，美剧、韩剧、日剧、大陆剧都好多争权，争地、争家产嘅剧集，点解人哋咁多人睇呢？因为人哋争得好睇啰，唔会好似溏心咁，争产流于几个女人口舌之争，妳一句我一句，加啲金句，就觉得好劲，《溏心3》讲明商战，但原全feel唔到，商战𠮶种尔虞我诈，攻于心计嘅剧力，似牛头角街市顺嫂哎交多过争产。

观众喺呢９年里面，因为睇咗各地剧集，而不知不觉中进步咗，再加上煲剧已不再局限于电视机，而家连老友记都识用手机睇剧，选择多咗，搭车只得一个钟头时间，观众宁愿睇netflix《王冠》第二季，韩剧《Two cops》都唔睇你《溏心风暴３》啦，系咪因为罢睇TVB问题？唔系㖞！《溏心》之前的《降魔的》叫好又叫座，就连成日话唔睇TVB嘅朋友都追睇，咁就已经证明观众系聪明，好睇嘅就一定追，唔会因为边个拍嘅问题。

当然溏心有４０集，可能之后去到２５集后，多返啲大龙鳯、互掴，收视可能会上返，但睇走势机会就唔大，因为头１０集储不到观众，系好难煲得起，《溏心３》最大问题系剧本，睇返《降魔的》成功，其中一样系剧中有伏线，为了力哥力嫂那场戏，剧组铺了１１集，观众睇到哗哗声，《溏心３》有冇呢啲剧本细节呢？暂时就见唔到，编审可能仲觉得观众仲系停留听对白睇电视嘅年代，剧情越简单易明就越好，咁就正正反映TVB制作人对时代嘅触觉唔够敏锐，如果再用以前𠮶套继续做电视，相信收视只会进一步向下滑。