【任噏乱评】农夫Do姐愈见默契　马国明角色定位令笑位威力大减？

现正播放嘅《Do姐再shopping》已经系第二辑，郑裕玲同农夫嘅化学作用，C君陆永转数之快，令整个节目充满笑料，大受网友欢迎。除咗佢地三个铁胆，会有一位艺人做嘉宾主持，日本有黄翠如，而新一星期丹麦就揾来马国明。本来网友嫌黄翠如喺节目中扮无知表示反感，点知轮到马国明出现，反而又怀念翠如同农夫嘅笑料，唔通天然呆喺主持方面真系唔WORK？

先旨声明，无讲过丹麦篇唔好笑，单系去刀具店C君一句“Although唔使but(刀唔使拔)”已经令人拍案叫绝。不过整体感觉上，笑料密集程度上，真系无黄翠如𠮶几集多，明明马国明最近人气爆灯，成为今年视帝顶头大热，点解会有咁嘅反差？其中一个原因可能系佢招牌天然呆，虽然单系睇佢嘅呆样已经好好笑，不过作为一个节目主持来说，单系背好资料其实唔足够，试完有自己感受，又或者睇得好开心食完表现到好好味，先吸引到观众。食之前好呆食完又好呆，好似连主持都唔觉得好食，咁又做咩介绍俾大家呢？

另一个问题，其实唔系马国明嘅问题，而系角色定位问题。大家都知主持一定有分上下把位，最佳例子就好似森美小仪咁样，一个聪明啲醒啲，揶揄蠢啲笨啲嘅拍档，尽管可能只系扮出嚟，但一醒一笨嘅配搭，就好似睇小丑表演都会一精一笨，先系观众百看不厌嘅法则。《Do姐再shopping》中，Do姐做上把系必然，农夫俾佢闹吓打吓绝对无伤大雅，本来3个人已经系最好配搭，硬系要每个地方加多一位嘉宾主持，就要为佢再度身订造一个角色。

日本篇中黄翠如继续一贯傻大姐做法，农夫不时取笑佢，Do姐锡住佢之余亦会不时话吓佢：“翠如呢度有试食呀啱晒你﹗”既系笑佢贪小便宜，亦放大佢嘅悭家性格，大家有个共同取笑对象目标明确，容易令观众投入。加上黄翠如话晒喺有线、Now都系拍旅游节目出身，掌握节奏方面的确比较得心应手。反观丹麦篇中嘅马国明，明显想建立有计划有品味嘅上把位俾佢，讲咩Do姐都话佢啱，拣嘅衫又话特别靓，背资料又话有做功课。

要造出反差农夫唯有做下把嘅下把，马国明拍马屁就赞佢食“聪明豆”大，农夫跟住擦鞋呢？Do姐唔受之余仲话佢地食“臭丸”大……就好似网民所讲：“主要笑点都系农夫同DO姐互笑，马明加入变左农夫同一伙赞DO姐，想取笑马明又好似要就住就住，佢赞左DO姐农夫又无理由踩，少左好多火花。”一句讲晒，节目设定失咗平衡，希望下星期到萧正楠加入，可以有番多啲化学作用啦。