【港女讲感情】去旅行前要做资料搜集　其实杜如风丧买又有咩错？

上礼拜森美个旅游节目《森美旅行团》开播，佢主Key带埋一班青春少艾好似高海宁、黄心颖、麦美恩去日本旅游，睇个阵容直程系《学是学非》嘅旅行版，畀啲新意啦大台。有集讲森美睇日落谂起老婆感触到喊咗出嚟，好深情讲咗句：“我觉得爱情原来有时候要对方唔喺你身边，你先觉得需要佢。”全世界即刻吹捧佢系好男人，顺带连个节目都被人狂赞，话佢带队好有深度，食只天妇罗都可以讲到段故，解释天妇罗唔系日本自创而系葡萄牙传入，就连食松茸都可以搭到几句嘴，系威嘅！

但唔明点解大家一赞森美，就要踩其他人去垫高自己，闹嘅就系杜如风嘅《XX攻略》，话佢死港女净系识食买玩，一啲深度都冇，似足“港灿”。仲大条道理话要好似森美咁，食松茸要知道松茸系点种，先至叫有深度，这趟旅行才算无负这一生，仲摷埋森美会考几多分，读边间大学出嚟讲，反过嚟话杜如风肤浅垃圾，What？先唔讲旅行的意义，大佬你咁系人身攻击㖞，依家做主持人都要比较学历，你唔揾麦明诗嚟讲？杜如风未嚟大台𠮶阵喺Now做旅游节目，出名系傻更更，成功吸引到大家注意，先被人挖角过嚟，你钟意睇旅行版《学是学非》，唔代表大家唔可以睇杜如风Shopping channel。

再者，你估森美真系同你自由行，全部行程、讲稿都系自己Plan咩？Come on James，大个喇，你唔好再咁天真啦！去旅行一定要有意义嘅咩，讲到要有得着咁夸张，不如飞去日本做义工算啦。其实咸鱼青菜各有所爱啫，去旅行可以去买嘢又好、行博物馆又好、丧食又好、睇风景又好，就算日日瞓系酒店唔出街都好啦，都系个人选择啫，你自己钟意做咩咪做咩啰，唔需要强逼人哋同你一样，去批评人哋嘅个人价值观，轻松吓啦香港人。