【森美旅行团】浸温泉爆肌上围仲劲过高Ling　森美：呢个唔系重点

森美大哥一向都系大台嘅宠儿，之前孖住小仪拍过资讯游戏节目《千奇百趣》，介绍日本趣怪事，因为反应好已经翻啅咗好多次，之后又一拖六带住班𡃁妹“是非精”拍《学是学非》，教大家唔少生活上嘅冷知识，依旧好受大家欢迎。既然个势咁好，今次就继续由森美用知性方式带大家去旅行，《森美旅行团》一出街之后网民大赞，话平时听森美电台个节目《早霸王》已经觉得佢转数快，估唔到做旅游节目质素仲高，吸收到好多知识咁话。

其实睇得多杜如风嘅吃喝玩乐、疯狂Shopping《东京攻略》多，可能都会有啲饮饱食滞。反而睇吓森美大哥嘅小品家庭式旅游节目都几写意，佢有别于杜如风嘅饮饮食食风，行嘅平民家庭乐，拣啲一家大细都适合去嘅路线，好似搭火车就食几百yen嘅火车便档；浸温泉又推荐划算嘅“日归”玩法（早上十点到下午一点就系日归）；就算去到东京都唔一定Shopping，原来仲可去撑船钓鱼，真系估佢唔到。

有得森美系度，当然唔少得过大家几招同大家上吓堂，话晒森美都系“喇沙仔”，中大毕业之后仲做过Lecturer，就算食只天妇罗都可以讲到段故，原来天妇罗唔系日本自创，而系葡萄牙传入嚟，就连食松茸都可以搭到几句嘴，真系好似睇紧《学是学非》咁，长知识了！如果话杜如风系𠮶本“闪令令”嘅旅游书，咁森美就系旅游界嘅Lecturer！今日（3日）森美同小仪喺《早霸王》度讲起温泉呢一幕，寻日（2日）节目见森美好潇洒咁除咗佢条浴巾，小仪就八卦问佢系咪真系真男人全裸上阵，森美就懒神秘咁话：“呢个唔系重点啦！”森美有份主演的《夸世代》下周一(6日)就出街，相信到时大哥会再变焦点啦！