【港女讲感情】宋宋结婚好幸福　其实姊弟恋又有乜好怕

今日(31日)系宋宋结婚嘅大日子，宋仲基同宋慧乔由萤幕CP戏假情真，一套《太阳的后裔》将2个人拖埋天窗，终于走入教堂变宋生宋太，原来呢个世界真系有童话。开头大家对呢对姊弟恋都唔睇好，宋慧乔今年36岁，大宋仲基足足4年，2个人之间唔止系年龄差距，宋慧乔早宋仲基12年出道，啱啱出道冇耐已经担正女主角拍《蓝色生死恋》，席卷整个亚洲，之后有同阿Rain（郑智薰）拍《浪漫满屋》，讲起韩剧，宋慧乔基本上就上咗神台，人红自然接广告接到心软，佢同全知贤都堪称系韩国嘅广告女王。

好快呢对萤幕CP被传媒影到佢哋拍拖，而佢哋好快又承认咗，又好快咁宣布结婚，全部嘢都系极速咁进行。宋仲基畀人感觉青靓白净，须根都冇条，净睇样就觉得佢吊儿郎当，玩玩吓咁，点知宋慧乔咁多个男朋友，好似李秉宪同玄彬咁，明明被人感觉好Man，好成熟稳重咁，但最后都系唔可以走到最后。反而呢个弟弟就最有担带，话结婚就结婚，仲推晒job去同宋慧乔筹备婚礼。

其实女仔讲嚟讲去都系想要安全感，安全感唔系话你有冇钱，好似宋慧乔咁，论金钱地位，完全系赢宋仲基几条街，如果系讲钱嘅，由一开始就唔会一齐。讲到尾，女仔都系想揾个同佢手拖手走到最后嘅人，广告都有讲“给女孩一个家就是嫁”，李秉宪、玄彬就算表面几住家男都冇用，依家咪又系娶第2个同其他女仔一齐。真男人系应该以结婚为拍拖嘅大前提，如果唔系结婚嘅就唔好晒大家时间，女人青春有限，社会成日洗脑话女人年纪越大就会折旧，迟结婚就话你卖剩蔗，三十岁未结婚就话你冇人要。宋慧乔今年就36岁，而宋仲基只系32岁，系佢嘅上位奋斗期，但佢并冇因为怕影响粉丝而唔承认拍拖，或者拖住宋慧乔唔同佢结婚住，佢认真对待呢段感情，畀宋慧乔一个确确实实嘅承诺，咁先系个真男人！