【后生仔倾吓偈】药房太子爷系兵？　麦明诗自爆：40岁未嫁会娶我

今集《后生仔倾吓偈》主题就讲男女之间系咪有纯友谊，由麦明诗、冯盈盈、陆浩明同一班大学生一齐玩“大冒险”，拣三个朋友Whatsapp佢问：“你觉得我哋之间系咪得纯友谊？”，而最近绯闻多多嘅麦明诗就被抽中，佢要系电话度拣3个朋友send呢个暧昧讯息，冯盈盈见麦明诗拿不下主意，就帮佢拣咗坤哥，仲抽水讲话：“谂紧使唔使拣林作啫！”，真系气氛尴尬到震。大家就提议佢拣身边的好朋友，但麦明诗就好担心朋友误会：“我搞到人哋以为有希望咁点算？我friend亲通常都系对我有意思，um……，我一厢情愿觉得系咁啰。”不愧系港姐冠军，真系对自己特别有信心！

麦明诗之后又大谈自己嘅感情观，“我觉得细个比较重感情，你好需要𠮶一刻嘅冲动，但大𠮶之后拣男朋友会理性好多，你会考虑一啲客观条件，例如我哋性格夹唔夹，有时就算唔系好有热情，但长远作为伴侣系适合嘅，都会选择接受。”麦明诗形容结婚对象系要你唔介意同佢一直共渡几十年嘅好朋友，在乎大家舒服又融洽嘅相处。

节目到最尾终于公布麦明诗3位好友对佢暧昧讯息嘅回复，第一个就系坤哥，佢话：“OH, YES，We are friend and 同事 so唔系纯友谊啰，Or you just treat me as同事 咁就友谊又没啦 ”覆得咁玄妙，坤哥果然系情场老手！而第二个就系同麦明诗一齐拍《使徒行者2》嘅杨潮凯，佢就话：“我唔想啰！”但杨潮凯结咗婚架㖞，今个月头仲宣布有BB，唔通佢知道麦明诗系玩佢？

最后一个就系之前同麦明诗传过绯闻嘅大药房太子爷Thomas Chong，佢个回复系：“Yes, don’t tell me you are suddenly in love with me.”麦明诗解释自己同Thomas系冇嘢，大家嘅关系只系兄弟：“系我大学同学，基本上我同佢嘅关系就好似兄弟，我哋绝对系冇嘢，喺我角度系咁谂。”原来呢位Thomas系麦明诗嘅“大仁哥”，两个人相约只要麦明诗40岁仲系未结婚就会娶佢，真系相当Sweet！之后麦明诗怕自己嫁唔出爆料话自己仲揾咗另外一个朋友，约定佢38岁前仲未嫁就会娶佢，实行“双重保险”！