【港女讲感情】Stephy分手后变自立　如果女友仲要依靠你应该感恩

邓丽欣同方力申分手都成一年半，但每次出现喺传媒面前，大家都不期然会将佢哋两个联想埋一齐，毕竟佢哋由萤幕CP戏假情真，变成真实情侣，加上导演叶念琛为佢两个度身订造嘅MK爱情电影三部曲（《独家试爱》、《十分爱》、《我的最爱》），对唔少人嚟讲系心目中嘅梦幻组合。

但可惜生活中唔系成日会有童话故事，虽然不时都有传两个人复合嘅消息，但分咗手之后Stephy多次访问中都好斩钉截铁讲过唔会复合，佢话：“我觉得唔需要特别放低或者执着，大家顺其自然过自己生活。”最近叶念琛套新戏，虽然仲有铁胆方力申，但阿宝就唔再系Stephy喇，听到都觉得SAD。

方力申分咗手之后，就醉心专注操肌，日日唔系跑步就系GYM举铁，唔觉唔觉，以前方力申明明系钢条型，依家只手臂大只到成个The rock咁；而Stephy冇做阿宝之后，除咗私底下搞咗队排球队之外，仲接拍咗3部戏（《女士复仇》、《蓝天白云》、《空手道》），冲破自己嘅Comfort zone，唔再拍经典爱情戏，今年仲进军埋电影节，佢接受访问时讲过依家拍戏同以前做阿宝好唔同，“平时拍嘅戏都系一个星期准备，今次要用半年时间，因为要学空手道。”的确，我哋依家见到嘅Stephy真系成长咗好多。

好多时都听到大家会投诉女朋友唔够成熟，太痴身会想佢独立啲，但当佢真系清醒识谂嘅时候，第一件会做嘅事就系飞咗你！

前排喺讨论区有个好hit嘅话题，就话“女仔单身久了，学会自己扭樽盖”，一班港男就喺度抽水话班港女本身系咪小儿麻痺，扭樽盖都唔识？但你要知道，叫男友帮手扭樽盖绝对唔系因为自己扭唔到，背系原因系佢对你嘅依赖，听唔明？即系明明煮饭、洗衫、拖地其实人人都识啦，有边个真系自己做？大家唔系靠阿妈，就系点女友去做，问点解，又会话呢啲系女人应该做。虽然就话男女平等啫，其实不嬲都唔平等架啦！如果你女友叫你帮手扭樽盖，你应该感恩，因为佢仲依赖你需要你，当佢可以自己扭嘅时候佢已经唔再需要你！