【后生仔倾吓偈】麦明诗都想买楼：有时好攰返屋企都要交货㗎嘛

今时今日喺香港，想上车买楼做业主，实在谈何容易，大学毕业出嚟揾2万蚊1个月已经算好叻，莫讲话去旅行，扣除交通食饭俾家用，即使每个月储到1万蚊，都起码要5年时间先有足够首付。十优港姐冠军麦明诗而家住紧逾千呎3房单位，佢都坦言希望搬出嚟住：“返屋企都要交货㗎嘛。”

香港人典型嘅一条路，读好啲书，大学毕业揾份好工，拍拖结婚买楼生小朋友，麦明诗其实已经赢在起跑线，新一集无线节目《后生仔倾吓偈》围绕年轻人置业，陆浩明问佢希望搬出嚟嘅原因时，她忽然表现得好灰心：“（咁你想搬出嚟，除咗Free啲系咪想同居？）（麦明诗静3秒）暂时未有呢个逼切需要。我18岁𠮶时都以为自己24岁结婚，我到咗25岁连拖都唔想拍。（人生拍拖买楼都系为咗有家庭啫）而家拍拖9成都散㗎啦，何必嘥时间呢？”都系25岁啫，做乜忽然好似对感情完全失去信心一样呀……

的确，大家曾经对麦明诗放弃做律师，选择入娱乐圈大感不惑，原来系因为佢明白，律师收入增加幅度，其实比艺人少好多：“当时大学住宿舍，父母会俾零用钱喺外国生活，觉得好写意，唔使为五斗米而折腰，但之后发觉无安乐蜗，好似住天水围返将军澳，谂系搭西铁转地铁再转巴士，日日6点起身返工，到屋企已经10点，变相都会希望改变生活质素。”