【爸爸去哪儿】Jasper跌亲冇人帮　陈小春叫：自己爬起来

大陆综艺节目《爸爸去哪儿》第五季红潮不断，当中陈小春呢对父子更成为大家的焦点，你地仲记唔记得第一集Jasper揽住个大声公对小春话：“Can you stop angry now？”几日前应采儿post咗段父子二人拍摄最新一期节目的片段，发现Jasper又拎住大声公扮鸡仔叫，叫叫下仲反凳跌埋落地。

最新一期节目入面，节目组就去咗湖南凤凰古城拍摄，而今次小春拣中的屋企就养咗几只鸡仔，Jasper见到佢地当然爱不释手，所以坐咗系屋企门口同鸡仔玩。佢就坐系啲鸡仔几米前，用佢最爱的大声公，对住啲鸡仔话：“你们小鸡们，快点过来！”再好得意咁扮鸡仔“咯咕”、“咯咕”。

Jasper可能叫得太忘形，挨系凳背挨得太前，竟然连人带凳反低咗，搞到小春同一班现场的工作人员当堂吓一吓，但小春仍然用凶狠的声线叫Jasper：“自己爬起来。”不过叫完之后，可能小春都意识到啱啱果句有啲恶，所以即刻学Jasper啱啱咁“咯咕”、“咯咕”叫，氹返佢起身。好彩Jasper冇咩大碍，可以自己起返身，但心爱的大声公就跌烂咗。不过最紧要都系Jasper冇整亲，大声公就随时可以拎过一个，所以Jasper唔使咁唔开心喇。

不过应采儿似乎就唔系咁样睇依件事㖞！皆因佢post依条片的caption就写住：“这位摄影师很淡定！”睇嚟小春返到屋企要跪住玻璃，老婆先要听佢解释点解唔即刻去扶Jasper喇。