【中国新歌声】陈奕迅爆节目内幕：导演叫我同那英按一下
撰文： 洪晓璇
出版：更新：
近年内地综艺节目大受欢迎，重本投资拍摄真人骚及各项比赛，不过好多时节目过份戏剧化，现场观众投入度太高，都令大家不禁怀疑，其实呢类节目系咪戏一样照剧本做呢？陈奕迅日前上本港节目就大爆《中国新歌声2》内幕，原来导演真系会经过耳机向佢哋下指令！Eason喺节目中望住经理人问：“我地合约有无写唔讲得呀？”
Eason担任ViuTV新节目《吹臣》嘉宾，面对陶杰、卓韵芝、邹凯光等8位主持，一人一句大逼供。节目一开始就问Eason，点解加盟内地节目《中国新歌声2》担任导师，佢话其实从第一季起制作组就不断邀请，刚好今年无安排巡回演唱会有空档：“觉得好似几好玩，听过咁多话黑幕嘅传闻，我又好想入去睇下有几黑，到底有无呢啲野，睇完我就真系唔觉有。不过……”
“我听得出系同一个人，但我唔知其他三个导师有无听到，刘欢呢次有按转身，我就同第一次听同样感觉，然后导演喺耳机叫我同那英“按一下按一下”，我估佢系想有啲戏剧性。我有问导演系咪识啊？点解俾多一次机会佢？导演就话唔系，不过见第一次我地四个都有啲反应，所以想俾多次机会呢位参赛者。”根据Eason喺节目中嘅提示，呢个学员应该系初选唱《浪人情歌》，被刘欢拣中入队嘅张婉清。
至于内地比赛必备嘅“超抢镜观众反应”到底点嚟呢？陈奕迅接讲：“我呢个节目嘅观众好少喊，应该似系另一个多啲。观众其实好惨，𠮶啲现场观众其实得一个饭盒，𠮶度有个台湾FM（录影指导）辉哥真系好正好励志，即使录影到凌晨两点都好HIGH咁带动气氛，你知啦台湾人有呢啲特质，大家录到好攰见到佢咁都会继续俾反应啦。”