《Running Man》全昭旻李光洙暧昧新CP　接棒周一情侣Gary宋智孝

韩国综艺节目《Running Man》自从Gary下车之后，又闹出宋智孝同金钟国“被下车”事件！令呢个逢星期日陪住大家足足7年嘅王牌综艺节目，差啲就此玩完停播！好彩《Running Man》最后都渡过难关，更加入新成员梁世灿和全昭旻。无可否认冇咗智孝同Gary呢对“周一情侣”互动之后，《Running Man》嘅精彩位都减少咗，相信睇开RM嘅观众都会有同感吧？幸好随住新成员同旧有成员愈嚟愈有默契，《Running Man》嘅新CP又诞生喇！佢哋就系全昭旻同李光洙，呢对CP唔单止私底下上过对方屋企过夜，更有“定情信物”添！而大家在《Running Man》又睇过几多全昭旻同李光洙暧昧嘅一幕？

全昭旻同李光洙CP缘份系咁开始嘅！

讲到全昭旻同李光洙“缘份的开始”，就要讲到昭旻今年3月仲未成为《Running Man》固定成员时，以嘉宾演出的一集。当时全昭旻同李光洙做拍档，而身为“背叛Icon”的光洙竟然反被全昭旻背叛，两人嘅“冤孽缘”就系咁展开！

浪漫过偶像剧嘅定情手绳！

《Running Man》成员今年6月去日本玩战栗迷宫嘅一集，成员们一齐走入精品店，而当全昭旻见到条宫崎骏手绳好钟意，更撒娇要李光洙买，当时光洙一句：“讲埋啲冇用嘅嘢！”点知最后埋单时，光洙二话不说cool爆递手绳送俾昭旻，原来光洙竟特登折返买手绳呢！呢一幕系咪好似台湾电影《我的少女时代》入面，王大陆偷偷买刘德华公仔锁匙扣送俾宋芸桦一样咁浪漫呢？9月一集《Running Man》内，李光洙要同全昭旻去印度尼西亚接受惩罚，昭旻更戴住呢条定情手绳现身，仲问光洙靓唔靓！李光洙即刻笑开花话：“好衬你！”真系闪爆人群！

《Running Man》成勋和全昭旻甜蜜互动　李光洙吃醋紧张盘问

全昭旻冧男星，李光洙会呷醋！

最近好多韩国男神上《Running Man》做嘉宾，全昭旻认真好福气，唔单止可以同姜河那互相撒娇扮情侣，仲伸手摸过成勋嘅胸肌！不过次次都俾李光洙发现，而光洙仲会冲出去阻止，就连成员刘在锡同Haha都怀疑两人有古怪，Haha更话：“呷醋嘅话有啲古怪㖞！”

Suho@EXO加盟Netflix《犯人就是你》　Running Man导演再拍刘在锡

醉酒过夜事件！

李光洙上过全昭旻屋企过夜，仲见埋家长，呢件事已经通晒天！两位当时人都承认过，当时李光洙饮醉酒不醒人事，全昭旻刚好打电话俾光洙，于是代理司机将光洙带到昭旻屋企，第二日光洙瞓醒仲同昭旻爸爸合照添！“过夜事件”尚未完结，最新播出嘅一集《Running Man》中，李光洙已戴住测谎机被Haha同宋智孝“盘问”！Haha问到上次同全昭旻一齐去印度尼西亚时，昭旻有冇入过李光洙间房？当李光洙答“冇”之后即被测谎机狠狠电了！即系讲大话！李光洙立即澄清话只系喺房入面倾过拍摄事宜，不过Haha同宋智孝就一于好少理！到底全昭旻同李光洙呢对《Running Man》新CP，系节目效果定戏假情真，就留俾观众自己想像喇！

更多《Running Man》全昭旻与李光洙图片：

我哋01韩迷嘅facebook专页Kpop 01已经开咗喇！想知道更多韩国娱乐、饮食、玩乐、时尚资讯，快啲去畀like啦：https://www.facebook.com/hk01.kpop/