【胡说八道真情假期】姊妹情点止咁表面 胡定欣：我哋从来冇闹交
《胡说八道真情假期》刚刚播映到第5集，6位姊妹胡杏儿、胡定欣、胡蓓蔚、姚子羚、李施嬅与黄智雯在节目中继续带观众又食又玩游澳大利亚。刚巧剧集《同盟》中，胡定欣与姚子羚也有一同演出，所以很多网民都觉得她们特别好朋友。而胡定欣就接受了《香港01》的访问，分享了她与姚子羚第一次见面的回忆。
胡定欣说：“我同子羚嘅认识系...我谂叫做真系认识应该系《酒店风云》。其实我嘅戏份系好少好少，跟住我哋一齐去菲律宾拍外景。咁应该系𠮶时开始识，其实冇话好记得识𠮶日系点，因为一路都系同事吖嘛！咁𠮶个trip应该系特别熟咗嘅。（同房瞓？）唔系，不过系大家都有倾有讲，好自然嘅一件事。”
还记得在早前的一篇姚子羚专访中，姚子羚就说过：“胡定欣俾我嘅印象就系太过认真！”而胡定欣其实对子羚的初印象就有另一种看法。“子羚吖！我对子羚第一印象？我唔记得喇㖞，哈哈哈！可能同大家一样啦：‘一个好柔弱嘅女孩子’。因为𠮶时真系冇宜家咁交心。𠮶时系比较同事式嘅friend啰！跟住大家先至开始熟络。我觉得人与人之间好多嘢都系缘份。你‘click’（投契）到就自然会做朋友，唔会有咩特别原因，觉得倾得埋。其实人与人之间，你直觉可以交心嘅时候，你就自然会同𠮶个人做朋友。”
“其实我哋6个人性格都唔会100%似。但系大家志趣，或者谂嘢方向，有时嘅做法系一样，所以我哋做到朋友。但系我哋6个人今时今日嘅感情都要经历咗好多嘢，先至形成到今日6个人嘅感情，唔系拍出嚟㗎嘛，唔系拍剧吖嘛！你睇呢个节目，首先系冇稿，真系writer开一个题目，我哋就讲，系讲到佢哋话：‘停啦，得喇够喇！’我哋仲谈论紧同一个题材，跟住佢哋见到我哋一啲反应好好，又被迫攞返出嚟拍。即系你要个friendship好厚，你先会讲到，同埋有呢啲嘢出嚟！你话系咪特别有一样嘢‘click’到，又冇㖞！但就系你互相信任，大家对大家系点，同埋用咩态度。”
好姊妹之间的感情是怎样的呢？或者身为男人的记者不会明白。男人感到压力不开心时就会叫上兄弟，再拿着啤酒去公园或者海旁吹风。而胡定欣、姚子羚与一班姊妹呢？就选择一个简单的方法。“我哋会喺车倾偈倾好耐。呢样嘢系anytime，随时都得，系唔使专登约去倾偈。唔一定成班人一齐倾，总之大家需要，咁就anytime揾对方。我哋嘅关系就系会上对方屋企或者用电话去讲。”
“我谂倾十几个钟宜家就好难，拍剧就会，哈哈！但系你话倾偈倾几个钟就一定会啦！即系半夜3点大家个“胡说八道group”仲系会讲紧嘢。昨晚凌晨3点唔知做咩，大家又未瞓，一讲啲嘢就‘吧啦吧啦~’百几二百个message咁样，要慢慢追返嚟睇。”好朋友好姊妹其实就该如此，聊天到凌晨也可以。
6位姊妹，在镜头前似融洽，实际上镜头后她们也依旧一样融洽。“我想讲我哋6个人从来冇闹过交！唔知点解要闹？可能有时有啲嘢你听咗会唔舒服，或者有啲意见你唔系好啱心水，但系我哋会同大家say sorry，我哋大家系understand（了解）嘅，所以唔会有积怨，闹交！可能𠮶刻你会唔明我讲咩，或者点解佢点解唔系企喺我立场，但系你会知道就系因为佢企喺旁边，先可以好清楚咁去分析。”
“未必同你谂嘅系同一个方向，可能佢有第二个意见，但系你系明白嘅。大家个presentation或者沟通方法就系，‘首先你唔好唔开心先，我同你谂嘅嘢唔一样，但系呢一个我认为系应该咁咁咁...’呢个就系我哋沟通方法。要维系一班真正又珍惜嘅朋友嘅方法就系咁样。我谂可能大家都做同行，其实大家主要都拍剧，除咗豹嫂，大家遇到嘅问题，或者面对嘅嘢都好相近，所以讲出嚟嘅事大家都会understand，maybe自己经历过。所以咪可以分享同帮下一个人啰！”
看完前几集《胡说八道真情假期》，很多网民也会觉得胡定欣与姚子羚关系比较好。事实上，胡定欣解释她们6个姊妹其实不如观众看的简单。“我哋6个系一个状况，就系我哋各自搭每个人都冇问题，每个人对每个人都有唔同嘢。其实我哋各自搓匀捞乱都冇问题，所以大家倾诉嘅嘢都差唔多。我哋6个系喺一个好平均嘅状态。我想讲，我哋呢一份感情唔系大家所想咁薄。可能大家唔知道，净系觉得我哋喺节目度饮吖！食吖！嘈吖咁，但系呢个节目就系俾大家知道我看过节目，我哋嘅感情有几深。平时都唔会讲到喊，而有一啲题目我哋从来都未倾过，所以一啲心底话就讲咗出嚟。”
《胡说八道真情假期》这个节目中，一班姊妹时常在镜头前分享了一些个人的经历。胡定欣在《香港01》访问中说：“好多都有讲，例如我哋嘅感受，或者我哋对一班姊妹嘅睇法，或者大家经历过嘅唔开心时候，我哋互相帮大家，去一齐渡过嘅时候。”其实除了节目中说过的，公开过的。各人之间也有很多互相帮忙的事。
“其实有好多嘅，我谂你话帮得最多嘅应该系杏儿，或者豹嫂。其实平时我哋6个大家起居饮食都会照顾。如果事业上就系杏儿帮得最多，因为佢喺我咩都未有嘅时候，佢成日喺侧边帮我。𠮶时拍时装版《野蛮奶奶》，佢俾咗好多意见同鼓励我去争取机会。例如《舞动奇迹》佢会push我去争取，去做就去自己行呢一步。生活上就系豹嫂，因为6个当中佢就最得闲，我哋又住得近，我又一个人住冇饭食。所以好多时佢就会拉埋我同佢同埋豹哥一齐食饭。自己有啲咩心事嘅，佢得闲吖嘛，咪会揾佢倾啰。其实豹嫂系知道我哋最多秘密嘅一个，哈哈。佢就好似一个大家姐咁，同埋佢afford到时间去做我哋嘅聆听者。”