【壹号皇庭】扮师爷同毒犯倾偈攞料　监制邓特希：最怕俾差佬揭穿

25年前剧集《壹号皇庭》最近深夜重播，但依然有不少人追看，经典作品一定有过人之处，这套作品对当时TVB及香港观众来说都比较新鲜，欧阳震华、陈秀雯等主角，对白经常有大量法律专有名词、每集都有超过20分钟的法庭戏，充足的资料搜集，亦比以往认真，监制兼编审邓特希，当时为了剧集的真实感，试过假扮律师行师爷，跟真律师工作，更要接触毒犯，他说：“因为我同当时嘅团队，好想做到𠮶种质感，一个律师系嘅呢？其实律师剧当时对无线系新咋，外国已经好流行，我哋揾个律政处攞料，问过律师、差人攞料，但我发觉都系唔够，因为你就咁问，好一柀一眼，得出嚟嘅好表面，所以我试过假份师爷，跟真正律师开工.....”

“因为我想知差佬点做嘢，律师系点样跟单case呢？凭空想像都得㗎，𠮶个年代又冇互联网，但系感觉唔实净啰，（你当时已系监制？）系呀，有咩问题，因为我真系想知，当时有个律师同我讲：“我下晏会去酒楼见个俾差佬通辑嘅毒犯，咁你嚟唔嚟？”我话梗系嚟啦，我就扮系师爷跟住个律师，咁我就知道，真实嘅律师系点样同毒犯倾偈嘅呢？一个毒犯嘅心理、思维系点？我最记得𠮶次系星期六下晏，我同律师仲有个真师爷，跟个毒犯返屋企，因为律师想睇下差佬点搜过间屋，原来差人搜屋系点地板都撬烂埋，我真系要见过先知，律师原来又唔会直接同个毒犯倾偈㖞，佢会同个师爷讲要点，之后再由师爷同个毒犯再倾，因为佢要避免律师教过毒犯做嘢，而𠮶日我又明白原来自首都要睇时间，𠮶日系星期六，文书嘢冇人做喇，咁就一定掟你去臭格（覇留室），直到星期一朝早九点，咁即系你而家去自首有一日半喺臭格，咁最后个犯当然星期一先自首啦。”

为了攞料，邓特希做了师爷，游走电视台、律师行、差馆，除了清楚知道很多法律程序，更了解到一些真实人物的心态，他说：“譬如一个毒犯点睇坐监？佢哋知道衰咗啲嘢系抵坐监嘅，就算打唔甩都冇得怨，甚至佢哋会令自己舒服啲，佢哋会谂，我个年如果唔去坐，我就避唔到𠮶次劈友，死𠮶个就系我喇，所以𠮶天要我坐监系好㗎，你唔真系接触过呢啲人，你点会知佢哋点谂嘢呢？𠮶次因为我扮师爷，𠮶犯同我倾咗好多嘢，（唔怕穿煲？）唔惊呀，我最惊系俾差佬踢爆，因为如果你系师爷，差馆系有个list，结果有次差佬发现我唔喺个list入面，但只系叫我出返去咋，所以都好彩。”邓特希更表示资料搜集不是找个专家详谈就算，要对整件事充满好奇心，他亦觉得现在无线有些剧集，资料搜集不够认真，他说：“就简单嚟讲夜场查牌，班编剧有冇真系了解过差佬点查牌呢？如果有，佢哋唔会写得咁幼稚，查牌有程序㗎，我见有啲剧集系完全错哂，观众而家嘅生活体验好丰富㗎，佢哋一睇就会觉得好流，我觉得就算你跟唔上观众嘅口味或者经验，但都要尽量贴近先好放喺剧本到啰。”