【同盟】姚子羚真实的爱情世界跌过痛过　感恩现在觅得理想男朋友

姚子羚（Elaine）于无线剧集《同盟》中饰演的Kate与陈山聪饰演的Kent爱得轰烈，浪漫又激情。现实生活中Elaine的爱情路并不平坦，经历跌过痛过之后，现在终觅得理想男朋友郑子邦，两人更视对方为结婚对象，Elaine对这段感情非常珍惜，不需要轰天动地，只求细水长流；Elaine坦言钟意浪漫感觉，但浪漫对她来说很简单：“我哋比较实际啲，其实男朋友为我下厨煮意粉整pizza，我睇住佢整已经觉得好sweet，他本身唔识煮嘢食，会特登为我下厨，我觉得成件事好浪漫。”

她亦喜欢收到惊喜，谈到男友令她最惊喜的一次，她说：“有次我喺外地拍剧拍咗一段日子，好耐无同男朋友见面，他偷偷地来接我机，送我返屋企，原来还预先准备了一束花放在床上，他本身并非浪漫型，但都愿意为我花这种心思，我觉得份外惊喜。”而Elaine也喜欢为男友制造惊喜，会自制礼物给男友：“我试过整生日蛋糕、甜品、手工剪贴、Album等，喜欢独一无二。我都试过将份礼物收在床下底，再喺屋企贴一啲Hints，等男友慢慢揾出嚟，又试过写毛笔字送给男朋友。不过而家真系太忙冇时间。”

至于是否经常收花，Elaine说：“又唔系㖞，其实我主张大家唔好送花给我，但偶然一次都好开心，有边个女仔唔钟意收花？但就唔好情人节𠮶啲日子送，会特别贵，唔值，不如将买花的钱用来做更有意义的事。送花畀我最紧要讲心意，唔使话要好大扎，真心嘅一支都够开心。”子羚样靓身材正，咁好条件又会否很难追求得到呢？“我是一个典型的天蝎座女仔，直觉好准，钟意就钟意，唔钟意就唔钟意，如果有感觉就唔使对方花好多时间来追求自己，同样如果唔钟意人也不会浪费人时间，对人公平些，唔会畀人假希望，男仔约我我会有好感先应约，绝对唔会收兵。我会做返自己，展现返真我个性，我比较男仔头的性格，唔会扮到唔系自己咁。”

Elaine在情路上当然也试过受伤：“之前有男朋友试过出轨，我啲朋友话我会好似福尔摩斯咁去发现蛛丝马迹，例如他变得电话不离身，喺张床揾到有长头发，我亦会睇佢嘅梳化，有冇其他头发，直觉会令我feel到男友有啲唔同，有次他借了他的电话卡给我，突然有个内地电话发了个信息给他，写住‘亲爱的，你想我吗？’我问对方系边个，对方回我‘你咁快唔记得我？’我咪覆对方话‘唔好意思，我系佢女朋友，会转告他知你找过他。’对方即刻话‘唔好意思。’我记得之后仲要同男友去睇戏，我一直忍到睇完晒套戏先问佢，佢都无得解释，最后当然分手收场。我明白件事已经发生了，唔会泼妇骂街去责问对方。我失恋时都有喊过，都会揾朋友倾诉，其实分手时唔系最痛，而是个过程最难挨，喊完就同自己讲要重新出发。”而最令Elaine接受不到就是男朋友不尊重她：“只要对方尊重你，根本就唔会做伤害你的事，做任何事都会顾及你感受，尊重好紧要。”Elaine感恩现在有个好好的男朋友，很关心和很爱锡她。她自言现在已经过了最恨结婚的年纪，不会因为要赶结婚而给自己压力。