黎诺懿住过㓥房面包吊命　5亿驸马都挨过穷：人生唔应该顺风顺水

今日有报道话“5亿驸马”黎诺懿原来有段穷苦辛酸嘅过去，年幼丧父家境清贫要领取综援，入行后都要继续挨穷，他自己亦承认确是有段日子几穷困，应该是他在拍摄无线剧集《溏心风暴》的时候。那时他曾经租住红磡180呎月租$3000蚊的㓥房，一日三餐都要挨面包。好彩之后他凭住演出剧集《爱．回家》而正式脱贫，有稳定的收入，饰演角色“马壮”亦令他人气大升。香港01记者就有关报道致电访问黎诺懿，了解一下他那时到底有多穷，他完全不介意分享自己的过去说：“我话一日三餐食面包只是一个比喻，又唔系真是餐餐食面包，系频率比较高，因为面包便宜饱肚，我都系买普通面包店那些几蚊个的肠仔包和腿蛋包之类，尽量悭啲，应使则使，食得饱就得。喺屋企煮公仔面嘅频率都好高，仲平过食面包，间中都会买下罐头。无咩必要都唔会出街，避免使钱。我相信每个艺人都经历过呢个阶段，要自己落手落脚去挨返嚟。”

至于所住的180呎㓥房，他就谓环境尚算OK：“以前啲㓥房唔同依家，我住那间都几靓，有独立厕所也有一个位置可以煮食，好干净企理，有啲似精品酒店，住得唔辛苦，有窗有冷气，算系咁，合理的。”问到他拍摄《溏心风暴》时可有跟同剧艺人，例如他好友杨怡讲及自己的情况，他说：“我个人唔钟意报忧，无咩必要畀朋友知，唔系咩大不了嘅事，只不过系生活无咁富裕，我无因为咁唔开心。”最艰辛的日子，他的收入曾经得7、8千蚊，更加试过两个月无工开：“7、8000蚊交埋租畀埋家用都所剩无几，生活都几困难，自己要好悭先得。”

挨得咁辛苦，究竟有无谂过放弃？答案系有，他确有谂过要退出娱乐圈：“经历《舞动奇迹》前我曾谂过再唔得就唔再做艺人，可以话系我嘅劈砲宣言，觉得做咗十几年都无咩成绩，不如算喇。可能个天眷顾我，畀我好侥幸咁赢咗冠军，喺内地有啲知名度，公司重新发现我畀机会我。而喺内地拍《舞动奇迹》逗留咗8个几月，亦令我急促成长，之后返香港就拍咗《爱．回家》。《舞动奇迹》是我演艺生涯的转捩点，其实当时有得畀我拣，拣留在内地拍大陆剧，还是返香港拍《爱．回家》，我选择了返香港，因为我嘅根在香港，我想喺香港做出成绩嚟。呢个系年青嘅优势，那时我唔服输，觉得无理由香港做唔好就走返大陆发展，如果喺香港做出成绩先再返大陆就唔同，当时有呢股傲气，真系青春无敌。”

他坦言自从接拍了《爱．回家》后，收入都稳定了：“我做咗900几集，呢个数字对艺人嚟讲好多，一套剧通常都系得20集，就算我骚几低人工几低，拍咁多集都会有稳定嘅收入。（依家是最好环境的时候？）可以再好啲，如果有机会返内地拍剧我都会返。（舍得太太同小春鸡？）小春鸡系男仔嚟，要学识独立，我又唔系返咗去以后唔再返嚟，作为一个丈夫同一个爸爸，我都想努力赚钱令屋企人生活好啲，畀我老婆都会拣不如我去开工啦。”而他做了“5亿驸马”后，生活并没有比前变得富贵：“无咩特别，都是一样咁生活，我和太太都唔系追求奢华生活嘅人，平日出街多数也是吃车仔面、连锁餐厅或是街坊食肆，简简单单。我反而要生活得比以前更加踏实，唔想畀人标签咗我，要话畀人知我有踏实工作。自己本身唔系出身富裕，无必要因为咩身份去改变。我无因为我以前嘅经历而喊过，比我辛苦嘅大有人在，我觉得人生唔应该顺风顺水，咁会唔识珍惜。”