《战狼II》原著小说开电视版　吴京未必拍网友讲明唔想睇

吴京自导自演电影《战狼II》，内地票房突破55亿人民币，成为内地史上最卖座嘅华语电影，既然有得赚，无理由唔赚尽佢，据《战》嘅制片人韩颢透露，《战狼II》原著小说《弹痕》嘅电视版权去年已经被卖下，而目前亦已积极筹备当中，预计出年会开拍。

自从穿越题材喺内地被禁之后，谈情说爱似乎成为剧集唯一出路，但另一方面，以军事为题材嘅剧集如《亮剑》、《士兵突击》随即应运而生，且有不错的成绩，令唔少投资者认为军旅题材大有发展空间，再加上《战狼II》票房屡创新高，唔通真系有钱唔赚咩？

《弹痕》主要描述一群第五类特殊部队嘅职业生涯，其战场由原始森林、戈壁沙漠到冰天雪地都有，听落已经够辛苦，再加上吴京为了演绎冷锋一角，接受了特种部队18个月训练，要揾一个肯花时间同精力，兼有演技嘅男主角，真系谈何容易！再加上制作人开出条件包括“必须要和剧组签下与平时拍摄时间两倍的档期”、“期间不能接其他戏”等条件，令情况雪上加霜。至于网友对于电视版嘅反应亦似乎唔多好：“电影看够了，没必要再看一次电视剧。”、“一部电影能讲完的故事，为什么要拍成几十集？”一盘盘冷水冷过冷锋，投资者睇到的话，唔知会点谂。

虽然网友唔睇好《战狼II》电视版，但又好齐心咁去谂到底边位男星最适合做呢件事，有功夫底子嘅张晋、赵文卓、释小龙等人通通上榜，而曾经演过《智取威虎山》、《湄公河行动》同《集结号》嘅张涵予亦都被提及，但首要条件系“年龄不设限”，其实讲打得，香港区嘅樊少皇都唔弱，可以谂谂。