朱智贤爆龙哥删剪片段Big Big Channel复活 同鬼对打有得睇
撰文: 何志衡
出版:更新:
《Big Boys历险记》捧红咗龙哥,但系又cut走晒佢其余拍咗嘅片段,当大家都以为TVB唔想再畀龙哥“乾坤一开”嘅时候,节目主持之一嘅朱智贤竟然讲咗真相出嚟,原来TVB将删剪片段留畀Big Big Channel独家播。
身处韩国嘅朱智贤昨日去咗一间香蕉奶概念店,一边等食一边透过Big Big Channel开live,讲讲下有粉丝问佢有冇带埋龙师傅?佢就答:“冇带㖞龙哥点会俾我带嚟呀?龙哥我行我素嘛!”跟住就讲起《Big Boys历险记》:“不过我听闻《Big Boys历险记》之前电视删剪咗嘅片段嚟紧喺Big Big Channel大家都可以睇得番嘞!大家可以继续睇龙哥作法,龙哥ok啦因为都系拍摄咗两日啰见到佢。”
朱智贤口中所讲拍咗两日嘅片段,其中一段就系喺交通黑点超渡亡灵喊晒𠮶段,另一段就俾TVB删走咗,系龙哥(杜庆龙)带主持去到元朗荒废学校探灵。朱智贤早前接受《香港01》访问时讲述有关片段内容,参观下课室同四围环境,然后龙哥feel到有灵体喺附近,于是作法;朱智贤表示龙哥话要“同佢哋打过”然后阖埋双眼好似打功夫咁,龙哥仲讲咗句:“头先叫你投降又唔投降,而家打输咗先嚟投降?梗系冇咁着数啦!”
终于水落石出喇!TVB咁做法明显系见龙哥有话题,于是收埋片段嚟谷Big Big Channel啦!但系TVB行咗咁嘅先例,第时会唔会将啲剧集大结局都摆埋落个app度㗎?咁就烦啦!