罗天宇眼见陈懿德独自回应“雪糕事件”感痛心：被人问到好惨

罗天宇今日（14/1）现身电视城出席《万千星辉颁奖典礼2024》“最佳男、女配角”最后十强候选人记者会。罗天宇接受《香港01》访问时表示：“其实今年系好精彩，一开头嘅时候，我系有11个提名，有《最佳剧集》，有4套剧嘅《男配》等等，但好无奈除咗《最佳剧集》之外，就只得一个《男配》，入咗最后十强。咁所以个概率都比较低，因为有4套入，就只得一套得，咁所以希望大家可以多啲投我票，始终入十强都系好难，有大家投票嘅支持都好重要。”

提到早前买雪糕夜访陈懿德香闺断正，罗天宇笑言：“其实𠮶日我哋系约咗成班朋友去佢屋企玩，𠮶日我做完嘢之后就入去揾佢哋，然后就俾人影到我去买雪糕，真系唔好意思，见到佢就呢件事要回应，被人问到好惨。同埋啲雪糕佢系好似冇食到，因为都俾其他人抢晒。其实之前圣诞节我哋成班朋友都有去佢屋企玩，大家都有喺圣诞树度影相，自己影完都唔敢Po，都怕俾人攞嚟写。（新年会唔会去佢屋企玩？）唔知，睇佢搞唔搞。（你敢唔敢去先？）都OK嘅，因为大家都惯咗，同埋同佢屋企人都熟络，都可能去逗利是。”