曹永廉专访丨报细4岁闯乐坛　初入TVB月薪三千六：听到𠮶阵喊出嚟

曹永廉（阿廉）向来有“冰封侠”外号，初入行做歌手就是靠童颜，隐藏真实年龄长达15年。现踏入60岁花甲之年，曹永廉外表依然没老态，最近与几位兄弟合组男团“Hey Brother”，自言“几十岁冇嘢可以输”。走过人生半路，曹永廉经历过家道中落挨穷住木屋区日子，在TVB事业起起落落也不容易过，今次访问阿廉坦承最难承受还是儿子刚出世时，因担心养不起头家而患上情绪病，一度萌轻生念头，确实是男人最痛。

场地提供：Glasshouse Greenery

木屋区长大半夜误踩屎坑

曹永廉在四兄弟中排第三，15岁那年因父亲经营的制衣生意走下坡，一家六口由4房一厅大屋搬到九龙塘模范村木屋区。逼在100呎小窝，莫说冷气，连买一把风扇也得储两个月钱。“住木屋有个特点，就系天气热真系好热，天气冻就真系好冻！同埋落雨，我瞓喺张床上面系黐满晒胶袋，因为啲水会滴落嚟要垫住啲胶袋。”他更试过半夜三更外出去厕所误踩屎坑，“好似茅厕𠮶啲，即系一块木板啲乌蝇多到不得了，有个木板垫高咗（里面）有个洞，就喺𠮶度啲嘢（粪便）放落去㗎啦。我试过夜晚瞓到朦朦胧胧，成只脚踩咗落去！”

旁人眼中是从天堂跌落地狱，曹永廉却视为一种磨练，“呢啲经历真系要自己亲身领会过先知道，到大个咗系容易挨到苦。以前家庭环境唔系咁好，身边啲人又系咁样挨嘅，我又真系唔觉得有咩特别辛苦，或者畀人觉得特别惨呀。”

报细4岁加入乐坛

为帮补家计，曹永廉中五未毕业已开始做暑期工，几乎试匀各行各业，临时演员、装修工人、快餐店职员、清洁工、超市副经理、女性胸围销售员等等，可以赚钱都去做。虽然读书不叻，但曹永廉自小有个红馆梦，经常去卡拉OK唱歌，最后成功在歌唱比赛夺冠，顺利签唱片公司。不过，当年出道歌手大多数好年轻，曹永廉无奈地要讲一个大话：“我年纪比较大，但个样比较后生少少，我当时25岁，但都呃到人，（唱片公司）叫‘你讲21岁得㗎啦’，呃咗四年就开始入行。”

直至40岁，曹永廉才在一个访问中自揭真相，“以前唔会睇你身份证㗎嘛，报𠮶时问你几多岁？我咪话自己21岁啰，其实我系唔会呃人嘅，我身边啲人个个都知我几多岁，我觉得我唔系好想讲大话，记得喺我40岁𠮶年先公布我真实嘅年龄，但又舒服咗㖞。”90年代是乐坛的辉煌时期，曹永廉等足两年才有机会出唱片，可惜只有口碑，但销情麻麻，“出咗几只之后，公司都顶唔住啦，顶唔住我呀，要解约从此就（事业）上上落落啦。”他苦笑谓。

$3,600底薪入TVB感屈辱

曹永廉是一个真性情的人，失掉歌手合约，大哭一场；加入TVB，也大哭一场。没有了歌星光环，曹永廉拍过VCD及客串电影，但几组戏收入始终不稳定。1999年，他把心一横经一位经理人搭路加入TVB，但听到月薪即在电话中爆喊，“佢话‘$3,600一个月啫’，我𠮶阵时真系觉得好惨、好屈辱啊，𠮶阵时做开嘢可能唱一场show都有2、3千蚊，我喺电话𠮶阵时喊啰，但都冇办法，我觉得呢个价钱，当然啦我𠮶阵时唔系好识谂，点解会畀一个咁嘅价钱，临时演员嘅价钱嚟，但你亦都要明白大家系互相帮嘅啫，佢又未同你合作过，我而家识谂，咁但系都要㗎啦。”

30余岁仍欠落十多万卡数，直至演出《妙手仁心II》向众仁一角，让曹永廉崭露头角，他亦多次感激邵美琪，愿意与自己用情侣档姿态登台，助他在短短一年还清卡数，决心将4张卡剪剩1张卡。

照顾家庭压力大想过寻死

访问中，曹永廉多次提到“高高低低”，过了一关还有另一关。2007年，他与姜大卫和李琳琳的长女姜依兰结婚，二人是奉子成婚，有指当年他迎娶太太时没有给予分毫礼金，原来当年亦是他人生低谷，一度萌生轻生念头。

“男人点都要谂住将来头家，𠮶阵时（太太）又有咗，记得人工系1万松啲，老婆同我讲有咗㖞，年纪大家都大，冇可能有咗又唔要，咁就结婚啦钱啦，养嘅前景啦，唔系净系钱，因为你生个仔仲要谂住点养。”压力如山大，脑海一瞬间闪过“死”，“当然有个小朋友系开心，但自己困埋就好烦，瞓唔到觉，跟住下个月我又系赚呢份人工我唔够㗎㖞，奶粉各方面都要畀钱。我就喺度烦，有段时间系谂过好想揸架车大嗌，撞埋山呀好想，撞埋山咩都唔使烦。”

很多事情只是一念之差，曹永廉很快便醒觉情绪出现问题，求医但却难以负担900元一次的高昂诊金，最后还是靠向朋友倾诉，加上儿子出世后事业渐见起色，拍多了广告，逐渐走出阴霾。

相关文章：曹永廉专访丨外父姜大卫家族多猛人　有骨气唔想靠人：我都要面嘅