【港姐2017】佳丽即席斗戏　刘颖敏：只要谂下父母离世就喊得出

港姐行程紧密，影完外景就去火速去到国立台湾大学，向台湾资深艺人许杰辉学做戏。睇到其中4号刘颖敏（Angela）及5号梁雯蔚（Sandy）就即席设计场面演戏被老师点评。Angela示范了一打开门见到有人死咗就跪地爆喊，即刻疯狂为对方做心肺复苏；而Sandy就做返自己，扮去旅行睇风景，周围影相。

Angela就话自己太落力，一跪落地个下就撞亲，红咗少少，有啲痛。点解要做戏爆喊？佢就话：“一直以嚟好钟意做戏，喺屋企得闲都系Role Play，所以今次有呢个机会，都想做啲难度高嘅场面。”Angela跪地爆喊个下，佢话自己差啲喊得出：“个时就谂起我阿爸阿妈，一谂起佢哋死咗就真系接受唔到，就好想喊，讲讲下我都惊会喊。”好在，佢爸妈都仲健在。

呢个时候，访问Angela同Sandy的另一边厢，1号的张宝欣接受其他访问时，突然眼湿。事后再问她，她说：“我睇到Angela做心肺复苏，𠮶下好震撼，有啲毛管戙，（系咪好眼浅嘅人？）我本身同理心比较强。（听讲Angela谂起父母死咗㖞。）唔系啩，咁唔系几好。”