MCJin徒弟KT恶搞《中国有嘻哈》 Rap到流鼻血好经典：师傅都话劲
最近一见到朋友必定会讲一句“你有free style吗？”，呢句话出自内地真人骚节目《中国有嘻哈》其中一个评判吴亦凡口中，最重要系带挈了节目中化身做Ｈip Hop man的MC Jin成功杀入内地市场，但原来MC Jin有位徒弟现时都系TVB打滚，佢就系唐嘉麟(KT)。KT最近就与一班TVB好友胡鸿钧及张明伟等人组成“CHILL MEN休闲侠”一齐抽水拍短片做《一厂有嘻哈》，KT就话，“其实系想抽下师傅水，俾大家开心下。”
KT同MC Jin嘅关系既是好友又是师徒，2010年Mc Jin开经理人公司仲签埋佢做旗下歌手，“其实佢对我嚟讲已经唔系师傅咁简单，佢系我屋企人。”KT透露当年原本要推出专辑，但因MC Jin要开始计划反美国结婚生仔，所以将专辑计划搁置，但佢从来无埋怨过对方，“反而我系支持佢，返美国生活都好正常，系呢行系你嘅就系你，都睇得好淡，但𠮶下做音乐嘅火就熄咗，于是去TVB拍下剧。”而现时已进入TVB第四年嘅佢，都系因为当年阿Jin做《兄弟帮》主持的缘故，“佢𠮶阵做《兄弟帮》，监制叫佢带一班好兄弟上嚟，我系其中之一。”他笑言TVB监制当时见到佢外型系TVB系好少，“我又有纹身，又唔系靓仔小生样，觉得我好标奇立异，佢地就话不如签我地喇 ！”
但他当时未有即刻签约，因为同Mc Jin的经理人公司还有合约，直到2014年完约先签TVB。KT笑言当时入TVB有咩角色都做，“当时谂返其实我由细到大都好有表演欲，入到公司咩都做，就算过镜嘅都无所谓。”TVB出名揾钱揾得唔多，虽然未有透露现时的薪金，但幸好他都有做生意，“我本身好钟意车，所以就代理汽车零件生意，咁香港物价越来越贵，都要做下其他嘢帮补下。”
提到MC Jin近日因《中国有嘻哈》人气再度爆红，KT就话一直都有联络而前几日先同对方聚旧，“咁啱佢系香港转机，所以就有d时间食饭。我见到佢都有抽下水问佢你有free style吗？”之后问到有无趁机叫对方推荐自己上节目？KT直言，“讲真𠮶心系想嘅，但无讲出口。始终现在我系TVB嘅艺员，但我好想靠自己。”其后续道，“佢都有同我讲，其实我好佩服你，你又无左我都ok。我系电视机经常见到你，你都好嘢。”
讲到KT不得不提2011年佢系《欢乐满东华》中一路rap一路流鼻血，成为当时热门话题，今日重提事件KT表示因为鼻膜较薄加上正值冬天，所以就发生流鼻血事件并笑言当时老板MC Jin都有即刻打电话关心，“佢系电视睇完打电话问我有无事，我话无事之后，就话笑到好紧要。但最后话我好劲，一路流鼻血都可以唱完首歌。”