鼎爷做老板开私房菜 阿爷真系入厨房炒俾你食？
撰文： 李妍桦
出版：更新：
TVB十点半由袁伟豪同杨明做嘅《打工挨世界》今晚就会播完，之后就会由强势回归嘅《阿爷厨房》顶上，上季好评如潮，带起咗成个“怀旧粤菜”风潮，所以今次Season2食住个势会加多10集，30集入面会教大家煮九十几道唔同嘅菜式，咪即系一日教成3个𩠌，咁都好Chur㖞！但鼎爷（李家鼎）就话大台未有加人工，反而拍档谭玉瑛因为啱啱续约而有得加人工，鼎爷都抽水讲：“你就好命啦，我真系命苦！”
鼎爷煮嘢食手势咁好又边苦呢，嚟紧9月佢喺铜锣湾楼上铺嘅私房菜就会开张，“本身就8月开嘅，但因为装修问题所以要9月，个装修真系靓到你唔信！”我信架，听讲呢间私房菜投资过千万，老板之一嘅鼎爷仲会亲自巡舖：“我一个礼拜会落舖3、4日到，唔系长驻喺度，始终都系以TVB为主，如果有朋友嚟嘅我会亲自煮。”唔系鼎爷嘅朋友都唔驶担心，佢话如果有缘的话佢有时都会落场煮嘅，“我系行政总厨嚟，啲𩠌都系我同另外一个厨师设计，《阿爷厨房》入面嘅𩠌会有，入面未见过嘅都会有，总之就咩都有得食啦！”今次“鼎爷私房菜”系鼎爷嘅第一炮，会唔会再开多几间分店就睇大家够唔够捧场喇！