岛屿协奏曲｜大表哥唔敢望前排观众原因劲hurt 邓丽欣超有共鸣
ViuTV原创剧《岛屿协奏曲》讲述三位身处不同处境及人生阶段的香港女生，为了留在台湾生活而不惜用尽所有方法，如邓丽欣饰演的Yvonne出动假结婚；Sica饰演的Faye不停带著儿子征婚；毛晔颖与Stanley饰演到绿岛生活的香港夫妻，但由于老公的无所事事，加上疫情影响潜店生意，令毛晔颖完全不能享受台湾的生活。
对于相睇或征婚，Sica表示完全可接受，仲话“想征婚系因为想体验过程”，听到Stephy目定口呆, 仲十分好奇后生女嘅思维，Sica解释台湾男生虽然幽默，但自己嘅选择还是偏向香港男生，大表哥听到之后，即时推荐ERROR保锜。
留台拍摄长达一个多月，大表哥最开心系可以疯狂潜水，而入夜后嘅绿岛，随时可以见到流星。“晒黑唔系因为潜水，系因为我揸电动车，速度好慢，但好开心在条街有啲女仔著三点式行来行去，都几养眼。” 毛晔颖（Wing）嘅难忘事系长时间船上拍摄搞到有“黄金彩虹”，大表哥无安慰之余，仲拎出手机拍摄。向来体魄强健嘅大表哥笑言：“我都唔知佢哋呕咩，我从来未试过晕船浪，虽然我朋友好钟意晕船浪，佢叫姜涛。”
自称无灵异体质嘅Sica，喺台北拍摄期间，所入住嘅酒店除咗会“电视无嗱嗱开”、“张床弹弹下”外，最激一次系晚试听到钻门声。“ 一开始都觉得由佢，玩厌就会停，持续咗3、4分钟后觉得唔对路，觉得有人要分我尸，我开始大喊，我打俾阿Gi同经理人，交代埋后事，后来阿Gi落去揾埋职员时发现佢著得劲可疑，后来发现个钻门声系佢拆紧隔离房度门⋯⋯唔系嚟搞我。”
剧中，Stephy与Sica为留台湾而选择了极端手法。现实中，要拣一件极端事来分享，Wing原来曾做过娱乐记者，后来她报读了演艺学院。“4年又要交学费，又无收入，仲要一把年纪，都真系几极端。”大表哥说因为自己比较执著，所以做事颇为极端，如演唱会要大只，他会无所不用其技。“甚至演戏都系一样，我会睇好多戏同书、上好多堂，因为始终唔系演艺出身，呢个想法长期喺自己思想当中。”
大表哥所饰演嘅Leo对潜水有阴影，问到他现实中可有要克服嘅阴影，他说：“我以前唔系好够胆近距离望住啲fans，因为出道时有好多唔同攻击，又试过好多时派卡片俾大家时，佢哋会避开我或者眼神skip我，呢啲系好受伤害，其实即使前排fans meeting，佢哋上台握手都会skip咗我。我系好努力去消化呢啲事情，所以会导致我唔够胆好近望住啲fans，𠮶时演唱会，我女朋友佢坐好前，但佢‘点解你成晚都见我唔到’因为我系唔望前面⋯⋯呢啲系我几大嘅阴影，一路长存，但而家好好多，fans俾好多力量我。”同系偶像团体出身嘅Stephy，听完大表哥所讲，表示十分有共鸣，因为自己当年都只敢望住自己嘅fans。
Wardrobe & Shoes：Zegna （Stanley）、@mrselfportrait（Stephy）、美华氏（Wing）
Stylist: PIPA Creative（Stanley）、@queenie_yu #qystyling（Stephy）
Make up: Mon Cheng（Stanley）、Cyrus Lee（Stephy）
Hair: Seiko@HairCulture（Stanley）、Ritz Lam@myös（Stephy）