专访｜梁靖琪谈七魔女分工边个话事多？有个通讯群组竟冇佘诗曼份
梁靖琪（Toby）入行以来有不少负评，最主要都是说她靠父干、有监制爸爸梁家树和前无线高层妈妈萧笑鸣做后台，但演技又不算讨好，父母甚至曾心痛她，叫过她不如退出幕前。不过最近她在《家族荣耀之继承者》中饰演有钱女Nana，无法接受自己身世的爆喊戏令观众眼前一亮，有望成为代表作，难怪Toby都说，等了20年，终于有人认同自己，好像不那么“乞人憎”了。
成为人母后的Toby似乎比以前定性不少，而她与“七魔女”的感情亦令人羡慕，今次她在访问中也提到，七魔女各成员的岗位和相处之道，原来私下的佘诗曼（阿佘）跟剧中形象一样是个大家姐！
发型：Michael lam @ Beijing hair culture
化妆：刘柏麟 @Stephenmakeup
场地：Bela Offices
《家族荣耀2》成代表作获认同 初段被闹到唔敢睇负评
Toby在《家族荣耀之继承者》中的Nana，在前段是颇烦的一个角色，刁蛮、烂蒲，又爱要胁林峰陪伴自己，她坦言观众一开播已闹到飞起，她亦不敢睇评论，“话我丑样呀，点解会咁做，你好烦呀，你阻住林峰佘诗曼……好多人都等咗佢哋呢对Couple好耐，突然间嚟个咁烦嘅女仔，我角色又嘈㗎嘛，好惊呀，我谂头𠮶个礼拜之后我就唔够胆睇评论。”
她那时候甚至睇负评睇到喊，是的，以Toby被观众批评多年的人，心脏理应很强大，但原来直到今时今日她仍然会喊，因为她本来就是内心比较脆弱和敏感的一个人，“虽然话睇惯咗啦，20年应该惯啦，边有人睇惯㗎？都系唔好嘅嘢，佢睇唔到我嘅努力㖞，或者好中伤嘅说话我都会好伤心，我都会send俾阿佘，话‘哎呀，死啦，啲人咁样’，佢话‘哎呀，你畀啲时间啦，啲人睇落去就会明㗎喇！或者我先生都会叫我唔好睇，到真系中段我啲戏重啲，人哋发现原来有咁样一个反差，先多啲赞美说话，人哋开始send畀我先够胆睇。”
第16集，Toby与罗嘉良在泳池相拥痛哭的戏份，牵动不少观众的心，她的IG留言开始出现一些赞赏说话，她其实都几震惊，结果？又再一次睇到喊，“你做咗20年，你终于俾人认同喇。𠮶个感觉好幸运嘅。”其实自6年前《蚀日风暴》开始，观众已对Toby渐渐改观，她笑说：“好似慢慢觉得我冇咁乞人憎，顺眼咗。”而今次更像是梦想成真的感觉，亦不止一次说“终于”有赞赏，问她要强调“终于”这个字，是否代表过往赞美对她来说真的很奢侈，Toby不讳言以往观众弹多过赞，有些中伤的说话甚至是：“哗，你睇你阿爸个样，所以生到咁嘅样。”她替家人感到难受，亦实在很难不去介怀，但那时候工龄尚浅，她只能够躲起来哭，然后一边问：“我真系咁差咩？我真系咁丑样？”
被指靠父干讲足20年 父母曾心痛女儿劝退出幕前
Toby与家人关系相当友好，即使访问当日，母亲都来探班和接她收工。而以往网民对Toby的批评，很大程度亦源自其父母，只因两人在TVB的地位，令人觉得Toby靠家人才有工作。Toby深明难受的绝对不止自己一个，父母听到闲言闲语亦一样替爱女痛心，“佢哋压力唔会比我少，就算朋友都好，都唔会钟意听到你钟意嘅人俾人批评，俾人讲。我以前唔系唔努力，可能唔讨好就唔讨好，但系佢哋听到会唔开心，我相信佢哋都好Hurt，佢哋承受嘅嘢唔会比我少。”因此，父母原来一开始已叫Toby不要入行，其后又曾劝她退出，“佢哋两个梗系唔想我入行啦，有讲过你唔好再做喇，点解你要做呢？好多因素，人哋又唔钟意你，批评呀，𠮶时又做得唔好呀，佢咪话，唔好做啦，点解你要做呢？”
Toby的确曾因此动摇，计划转行做饮食业或是婚礼统筹，亦都在片场学做Project manager、揾演员埋班、涉足制作人工作等等，不过她后来发现，自己真的真的很喜欢演戏，不应该放弃。有些人成为人母后，会渐渐退出娱乐圈，把重心放在家庭，再也无心恋战；不过Toby却说，儿子的出现反而成为了自己的推动力，“因为我想教导我小朋友就系，你冇嘢唔得㗎！你勤力，你努力，你唔好放弃，你系得㗎！我恃住呢个信念，我都系觉得，我应该要做得更加好。”
Toby表示，成家立室令自己成长不少，眼界也阔了，“多得我小朋友同我先生，做咗人妈妈之后真系定性咗，个人睇嘢阔咗同多咗，亦都可能介意唔好嘅嘢少咗。（点解？）因为都冇时间理，I don’t wanna think about其他唔好嘅嘢咁多，我觉得开心咗好多，有佢哋嘅存在，令我有时都觉得，唔开心嘅嘢就算啦、冇嘢啦。”
笔者留意到，有观众留言说她终于可以摵甩“父干”之名，问Toby会否终于觉得有种吐气扬眉的感觉，她说其实随着入行时间愈长，自己对这个标签早已放下不少，毕竟血缘关系是无法舍割的关系，但她最开心的，是相信父母都会因观众对女儿改观而开心，问到父母有没有赞扬她，Toby透露：“我妈妈有send返畀我，我爸爸就好少会send呢啲嘢，但系佢都有send畀我。佢好鼓励，少讲出口嘅，但系有时会send个叻叻嘅嘅手势畀我。”
七魔女以佘诗曼为首 Toby负责搞聚会照顾姊妹
近日Toby和圈中几位好姊妹去外游，“七魔女”年过四十，但着起泳衣仍全部Fit爆，引起不了话题。她说当初与佘诗曼（阿佘）、文颂娴（文女）、周家蔚、汤盈盈、钟丽淇（Margaret）及姚乐怡因为饮嘢变熟，成为好友。不过对于“七魔女”这个朵，她们却不太喜欢，“曾志伟叫我哋七魔女，我哋话咁核突嘅，我哋就话系七姊妹啰。”这七个女人性格其实很不一样，但却又相处融洽，有凹有凸，问到几位姊妹性格以及在团体中的角色，Toby说文女人如其名是“文静派”，还很喜欢讲道理，“佢讲四字词语，讲到我系…… What is it？我同盈盈喺度ya ya ya，其实唔系好明嘅。”姚乐怡属于“问号派”，总是慢几拍，倾偈又跟不上进度；钟丽淇则有“Doctor Margaret”别称，任何人有头晕身㷫，找她就对了，反而就冇人会问请教汤盈盈，莫非她很笨？Toby大笑：“唔好话佢‘渣’，其实佢同我都系开心派。”
Toby解释：“我同家蔚系行动派，佢哋要乜嘢，我哋就OK，let’s get it done！我哋会帮你做，你需要我一定会喺度！”之前已听闻过，七姊妹去旅行时，Toby永远是最早起身，煮定早餐等大家，贤淑又抵谂。她说自己很喜欢照顾人，所以大家有想吃的东西就向她“落单”，而每逢生日会要准备蛋糕、礼物，她亦永冇托手踭，“总之佢哋唔使担心，有我嘅存在，边个生日嘅蛋糕，佢都知我会搞，佢哋好安心有我。”
至于阿佘呢，于剧集中常饰演女强人的她，私下都一样是团体中的大家姐，而且为人直接，Toby说大家都好听阿佘话，觉得她永远都对，所以有任何难开口的事情都会揾她做丑人，“我哋几个会推，话‘我唔讲呢啲嘢㗎㖞！’有时要猜包剪揼。（例如咩事要出动阿佘？）总之啲小事揾佢出动一定啱，有时我哋自己有人嬲咗，呢啲都会揾阿余，可能私讯佢问佢‘喂，有冇睇？有事！快啲听返个chat先！”
虽然几位都以阿佘马首是瞻，但原来其余六位居然有个通讯群组排除了阿佘，Toby说：“有一个系Mommy’s group。（冇做妈咪就唔入得？）得阿佘咋嘛！我哋惊烦到佢，小朋友读咩、着咩，感冒去边度睇医生，𠮶啲无聊嘢啰。（如果有一日佢做咗妈咪就可以入？）Come in, you are allowed to come in!”
阿佘与Toby在《家族荣耀之继承者》都颇多对手戏，既然两人如此熟稔，阿佘份人又直接，如果见Toby做得不好，会否也当面指出呢？Toby却表示：“冇呀，可能佢知我性格Sensitive，但系我反而对住佢最大压力，因为好好朋友呀嘛，你好介意佢点谂你。同埋我真系好仰慕佢，唔系净止you love this person，and this is your best friend，系佢个Acting又好好，就算佢喺网上讲嘢、做访问，我好钟意听，好正呀，所以我对住佢真系有压力！”
七姊妹从不比较 互相揾优点赞对方
七位都是艺人出身，但阿佘是三届视后，单计演艺成就的确最高，在出名是非多的娱乐圈中，她们却完全没有比较和是非，Toby指七位都很懂欣赏对方的优缺点，而且群组更是“夸夸群”，“我哋成日赞美㗎，‘你好劲呀！你做咗𠮶个银行代言人！’，We love each other that much，会互相support㗎。‘喂你好煮嘢食好劲㖞’，我哋永远揾好多嘢去赞美对方啰，友情就系咁样，但系有唔好嘅话，我哋有时候都会话你咁样好似唔系咁好，但系我哋从来冇hard feeling。”偶然可能会有人离间，讲某位的坏话，但七位都有共识地不会被任何人影响到友情，即使成员间有意见不合，亦好快冇事，Toby如此总结磨合之道：“我哋好快就唔再提喇，即系大家唔同嘅时候，就唔好再讲个topic，唔好令到大家唔开心！”