【娱乐回归20年】无线冇人接捧？　亚视叶家宝：停留黄金年代余晖

回归20年，电视生态起了翻天覆地变化，煲剧已经不再局限于睇电视，上网追剧已经成为新常态，但剧集质素好坏，讲到尾还是要有好演员，在97年前，无线亚视竞争激烈，而今天除了无线外，还有ViuTV及奇妙电视，但叫得出名字的演员，来来去去还是那一班80年代旧人。亚视的老臣子，曾一手策划亚洲小姐选举，仿如亚视icon的前亚视执董及高级副总裁叶家宝，最为人熟悉是他跟亚视共存亡，从未有跳船打算，但亚视欠薪偏偏他却要上身，最后罪成被罚款15万，别人不仁，他却从未有不义，至今仍为亚视讲尽好话，尤其是为已过档无线的一班亚视旧将。

扭开电视不难发现，好像在看当年的亚视，《不懂撒娇的女人》跑出了游生袁文杰，《亲亲我好妈》看到江美仪，《老表》系列有万绮雯，而亚视出身的田蕊妮更赢得无线台庆颁奖礼的视后。叶家宝表示：“以前就话亚视嘅人叫唔出名，依家佢哋自己栽培嘅人都叫唔出名，反而亚视嘅去晒佢𠮶度，好似万绮雯、袁文杰咁，都冇新一批人接力。我哋仲系停留紧当年黄金年代嘅余晖，睇紧80年代𠮶班人，好似冇新人咁，内地有小鲜肉、小花旦，但我哋啲新人又捧唔起，剧集重播反而成为要追嘅嘢，新嘅嘢唔会睇啰，自己睇返都觉得几可悲。”

叶家宝说现在的新演员，没有多少磨练的空间就要上战场，“内地剧、欧美剧嘅演员，都系科班出身，真系受过好专业嘅培训，睇返香港后生𠮶班嘅演技，真系要磨练下，刘德华、三哥苗侨伟嘅五虎都经历咗好耐，观众先接受，或者要等到好剧本好角色先至出到嚟，但依家系唔会花时间去慢慢培养一个人。若然要俾新人孭套剧，你又冇信心㖞，惟有俾旧人带住去做，但蚊蚊(万绮雯)都系一年拍一套剧，揾旧人救亡救得几多套？以前欢乐今宵系少林寺，依家冇咗之后，节目咪得返旅游饮食，变咗好单一啰。(绿叶配角都系同一班人？)系呀，睇到精神都分裂呀，啱啱睇完呢套做一个角色，下一套又见返佢㖞，成日话TVB艺人好多，但数嚟数去又系得返𠮶班。演员流失系事实，系香港拍剧辛苦，人工又唔高，不如返内地拍啦。现时系人才冇，内容又唔得，电视界咪变到一潭死水啰。”

亚视在97年前确实有过辉煌岁月，但自从回归后，内地商家入主，整个营运模式也改变了，最重要是自家制作的剧集买少见少，在结业前的数年，更要反复播出旧剧，而亚视的死因亦被归咎于欠缺具水准的剧集留客。叶家宝无奈道：“我都成日问自己，电视系咪一定要有剧呢？好多人都有唔同嘅睇法，但我认为一定要有具代表性嘅艺人，点解呢？剧系可以留到好多艺人，而好多艺人系钟意演戏嘅，好嘅角色先可以深入民心，而呢班艺人就成为咗你个台嘅icon，观众咪会去追啰，追佢哋嘅新闻，追佢哋嘅剧，慢慢对你嘅台嘅关注度高咗，呢样嘢有剧系帮到嘅。”叶家宝续道：“但系《今日睇真D》都好多人追，都唔系剧嚟，一样捧到一啲艺人出嚟，大姐明(林建明)、区锦棠、何B(何守信)，好鲜明捧到一啲艺人，有佢哋嘅地位，所以最紧要有好嘅节目俾观众睇。”叶家宝讲中要点，好演员与好剧本是相辅相成，但今天流水作业，胶剧充斥的年代，要看具水准的剧集，睇网剧罢啦。