阮民安寸“Loong 9”俾人笑足一世　曾志伟：讨论度高就系成功

无线节目《亚洲超星团》入选者组男团，曾志伟宣布团名叫Loong 9惹热议。前E-kids成员阮民安(Tommy)，就借机抽水发文爆料指，当年组合原本组合名叫A4：“153第一个帮我哋改嘅名，仲癫！系叫做 ‘A4！！！’当时年少轻狂的我喺佢哋兴高采烈咁隆重介绍我哋嘅时候冲口而出咁讲咗句：‘A4？？？纸嚟㗎？？？’之后全场静晒，然后153即时黑面加散会。”而提到Loong 9，Tommy说：“但呢班𡃁仔就惨啲喇，个名肯定俾人笑一世。”

曾志伟今日（15/3）现身中环爱丁堡广场出席《侠之大者-金融百年诞辰纪念》活动，就阮民安借机抽水一事回应：“我冇咩嘢可以同佢讲，佢一家系咁，因为好耐冇人见到佢，咪走出嚟啰，唔系啲人点会话佢抽水。其实Loong 9都冇咩特别嘢只要讨论度高就系成功嘅名。（有冇嬲阮民安？）冇，喺我哋呢行会用唔同嘅身份，同用唔同嘅办法去令到自己出位都系惯性。（A4呢个名系咪你改？）我哋永远改名最重要系好笑好玩，但改完用唔用唔知，而我都唔记得有咁嘅事，A4如果畀我而家，可能我都会用，究竟又有咩问题呢？简洁，同埋我哋改名如果用A系行到先呢就最好，因为字母上佢系行最快。之前有部电影《最佳拍档》Aces Go Places都系用A字行头，去到国际电影展，第一个讲就系讲我哋部戏，有时就系咁，好多人唔明，有时我哋大家开会，其实我哋系经过好多专家，同好多人深思熟虑，先去改过名出嚟，不过系冇办法去解释俾每一位佢哋听。”