胡鸿钧大胆用中学生创作　新歌风格稳中求变：唔会系完全格格不入

胡鸿钧（Hubert）今年继续与监制苏道哲（阿道）合作，继《心跳移植》和《整亲》后，近日再推出Lo-Fi R&B作品《今天不营业》，提醒听众在忙碌工作之中紧记自己初心，活在当下寻找快乐。新歌除了继续由钟说执笔填词外，更起用中学生Kudos Lam（林跃）创作的旋律，而Hubert在接受《01众乐迷》访问中提到，原来冯允谦（Jay）也是其中一位幕后功臣。

除了推出自己的创作外，今年有合作过的林宝、徐继宗、Kudos和钟说都不是过去经常听到的幕后班底。而今年Hubert求变的心态也正好透过与阿道选曲时反映出来：“我同阿道拣歌嘅时候，首先系睇啱唔啱我嘅风格，其次就系喺唔会比自己过去嘅风格有太大改变嘅情况下，我都会想尝试一啲新嘅元素。今年出咗嘅三首歌都系同我以往嘅曲风好唔同，但系都唔会系一啲我完全驾驭唔到，或者系完全格格不入嘅风格，都系一步一步尝试多啲唔同嘅曲风，跳出舒适圈，畀乐迷见到自己更加多嘅面向，听到我更多唔同嘅声音同演绎。呢个都会系我同阿道之后拣歌嘅方向。”

新歌选择与年仅17岁的Kudos合作，Hubert指较早前阿道曾向自己分享过不少demo，唯独这段旋律最令自己印象深刻，他解释：“我自己本身都对一啲R&B、Jazz同埋Lo-Fi嘅嘢好有兴趣，所以会拣呢首歌。”至于今次继《整亲》后再次邀请钟说填词，Hubert也不排除继续与她合作，又称赞对方用字浅白、直接之余，也非常贴题：“我觉得佢嘅风格系比较摩登啲，会用一啲好似口语，但系唔会完全系口语嘅方式，当中都有一啲玩味，可能唔只听众，我都会觉得佢嘅歌词除咗讲到我想讲嘅嘢，当中都带到一啲趣味，我都好钟意佢呢种独特嘅风格。”

Hubert承认过去甚少演绎R&B的作品，有见及此，他决定找Jay上课，期望可以把新歌演绎得更好。他直言：“佢喺我心目中绝对系唱R&B嘅王者，特别系广东歌。所以今次第一次接触《今天不营业》呢种曲风嘅时候，一开始我都唔清楚自己应该用一个点样嘅唱腔去唱，我当时即刻谂起Jay，于是就打畀佢，问佢会唔会有时间同我上下堂，畀啲意见。”

他指Jay除了特意录制demo示范外，也教导自己要透过聆听，慢慢适应唱R&B需要的感觉：“你问我需要改进啲咩，我觉得自己需要听多啲R&B，Jay都系咁同我讲，话唱R&B好多时候系讲求感觉，系考验你本身对R&B呢样嘢熟唔熟悉，好难可以用一啲技术层面嘅说法，或者透过一啲引导去教识你。好多时系凭感觉，所以真系要听多啲，感受多啲，包括一啲groove、节奏、力度，其实真系要精通咗呢种曲风先至会唱得好。”因此，他认为自己R&B初体验仅仅合格，不过不失，日后将花更多时间钻研。

被问到会否与Jay在音乐上有合作，Hubert也承认今年曾经试过与对方一起写歌，不过目前尚未有一首能充分展示各自长处及个人风格的作品，加上最近开始为各自的工作而忙碌，因此目前只停留在创作阶段，希望日后可以抽时间与Jay继续写歌，期待合作制成品顺利面世。谈起早前在电台访问中提及过，正准备年底的一个大计，Hubert称会在适当时候公布。