专访｜周国贤提早一年出个人单曲：呢个时势唔做唔知几时有得做

记得上年5月，当时身处泰国的周国贤（Endy）在YouTube上载半首《尘世美》，说：“当了歌手这么多年，从来没有试过在一首歌未正式有录好的final version前，便已经把它公开⋯ 希望大家明白我这么做的原因，是因为我觉得时代真的改变了，有些东西如果不趁早做，过了适当的时候、过了品味期限、它便会变质。”
踏入2021年，Endy除了演员工作外，也重拾乐队Zarahn主音的身份，最近个人单曲《尘世美》也正式面世。早前他接受《01众乐迷》专访时，除了分享灵修期间的领悟外，也谈起最近重返舞台唱歌的感觉，他直言：“其实我挂住夹band嘅感觉多啲，但系喺舞台嘅感觉都系挂住嘅。始终过咗咁多年，都系喺上面先揾到一啲活生生、生存嘅感觉。”
撰文：刘传谦
摄影：叶志明
场地：太古城中心

认香港生活节奏太急促

时间回到2019年11月，当时Endy把Instagram设为不公开用户，更把帖文及粉丝人数大清洗，令外界猜测是否再受情绪病困扰。他笑说：“间唔使都会咁，佢自己del咗都冇办法㗎！”后来大家都清楚，原来Endy在这段时间先后到日本及泰国灵修，他指过去曾经在纽西兰、日本和加拿大生活，加上在清迈生活的10个月，他坦言已经找到最适合自己的生活节奏：“我觉得自己系适合住喺一啲都市以外嘅地方，因为当生活节奏太快嘅时候，我其实会觉得好辛苦。我唔系要去深山修炼𠮶种，但系我真系啱慢，可能系我份人比较钝，唔想令到身边嘅人好炆，会畀人话谂嘢好慢，做嘢要快啲，但系我真系仲思考紧。以前我都会鞭策自己要谂嘢快啲，但系依家会觉得，其实慢咪慢啰，点解要畀人影响啫？其实会唔会系我慢，而系你哋太快呢？其实慢慢地、静静地做好一件事，都好过你好急躁咁做到100件事。”

用饮食领悟活在当下

在灵修期间，Endy指自己终于领悟何谓活在当下：“你都唔可以长期鞭打自己，因为过咗去就系过咗去，好多事情如果你太过怀缅过去嘅好，或者系鞭打自己嘅唔好都冇用，无补于事。但系活在当下讲就好容易，做起上嚟就真系好难。”他记得在灵修期间用餐时，导师就下令自己不能交谈，不要看著身边的其他人，而在进食时，在吞下每一口食物前都要咀嚼30-40次。他直言最初会觉得闷，但后来就开始在过程中领悟真谛：“习惯咗之后你打开自己嘅味蕾，感官会放大咗，将来你可以应用喺生活当中其他点点滴滴，行路又好，冲凉又好，就算系做一啲好细微、琐碎嘅事，如果你用心去做，你会知道点样去享受呢个动作。而唔系好似之前咁，‘刷牙咪刷牙啰！’，当你所有嘢都变得机械化就惨啦。”

不后悔15年前成立Zarahn

在泰国生活期间，Endy指自己也不时反思人生：“其实系几得意嘅，例如某一啲时间点如果做咗另一个选择，依家究竟会点？𠮶阵会谂返好多呢啲深层次嘅嘢。”他坦言自己41年的人生之中遇过无数两难局面，脑海中也幻想过在平行时空下的自己：“例如好多人会问我，2005年《极乐》出咗嘅时候，其实个人发展都好似几好，点解当年要走咗去做Zarahn呢？如果唔搞，可能依家会稳阵好多。但系直到依家，我都冇后悔过任何决定，我唔觉得做所有嘢都有啱与错，只系会话如果有机会畀我拣多次，我就可以带住呢个意识同记忆，所有嘢唔好咁情绪化地去做每一个决定。”

为完成童话三部曲重组

Zarahn在2010年后非正式地进入休眠状态，直到今年再以《猛鬼街》宣布重组。Endy坦言成立乐队是个热血的决定，后来成员间各自有个人发展，也经历过不少争执，谈起重组的决定，他解释：“过咗呢啲情绪上嘅风暴之后，大家又喺唔同嘅范畴经历好多嘢，最后可以聚返埋一齐。今次选择重新出发做乐队，唔系话想喺乐坛达成一啲成就，亦都唔系好笼统咁话要完成我哋4个人嘅一啲愿望。其实我哋净系想完咗佢，我哋系要完成呢件事，但系唔系话要好大力咁做，一啲都唔辛苦，反而所有嘢都系一呼一吸，亦谂唔到一个原因点解我哋要唔做，所有嘢都系自然发生。”

最近Endy都要分开Zarahn主音及个人身份工作，事隔11年再正式合作，他笑说鼓手Jerry变得非常幽默：“佢由打鼓变咗炒股，再做埋飞机师，依家生咗个仔之后，都唔知佢人生经历紧啲咩阶段，佢好似做每一样嘢，举手投足都充满喜剧细胞。我哋其实已经好认真咁做访问，但系佢……你可以睇返之前啲访问，佢真系好正。我觉得佢真系可以向喜剧发展。”

称尚在学习阶段：从来都唔会满意自己

不论个人身份还是以Zarahn名义发展，近年Endy的演出都深受乐迷欢迎，演唱会几乎全数爆满。谈起开始重拾在舞台表演的感觉，他谦称自己一直在学习阶段，例如每次在台上演绎时，他都要适应不同舞台上所带来的新鲜感，又认为自己与作为一位成功的歌手尚有一大段距离：“唱功有待进步，呢个就一定嘅。而我觉得自己嘅致命伤系冇自信，但系我好钟意呢种做所有嘢都冇自信而带来嘅𠮶种惊青嘅感觉，对我嚟讲，咁先至系Live。但系要进步嘅嘢实在太多，每一个时期望返之前嘅自己都唔会满意，从来都唔会满意自己。”

他也谈起自己最近开始练弹琴，希望可以如弹结他般挥洒自如：“其实我一路都有弹琴嘅，都有用琴写歌，而以前间中都会用弹琴嘅形式表演，但系我最主要嘅乐器都系结他，我都想提升返弹琴嘅技术，如果可以令佢同弹结他嘅表现平起平坐，咁就最好。”

三线发展音乐事业

“人生唔会有一个类似打爆机，长期好似喺派对咁庆祝紧，好开心嘅时候。我以前会好向往有呢个时候，但系人生唔系咁，而系随时下一秒就会有啲事情要发生，当然唔系话要长期处于好紧绷嘅状态，但系都要随时戒备。”这是Endy经历去年后学懂的事，同时也是提早筹备独唱歌的原因：“Zarahn𠮶边，童话三部曲已经如火如荼；我都会保持同其他歌手合作，嚟紧会有一位女歌手同我有超过一首歌嘅作品推出。而我嘅solo歌本身系想排到出年先发生嘅，但系因为……你知啦，呢个时势再唔做，都唔知几时先有得做啦，所以就不如郁咗先啦！所以几辛苦都好，我依家都会三线发展，仲未计电影𠮶边！”