许廷铿宣布进军台湾乐坛　无惧从零出发：反而我享受重新开始

许廷铿（Alfred）与华纳唱片合约完结后，周三（31日）首次以独立之姿出席品牌活动，面对外界的众说纷纭他表现得十分自如：“太多唔同嘅猜测，其实都冇乜值得担心，好似大家转工咁，而我一直都有自己嘅团队，对我嚟讲工作模式分别不大。”Alfred亦坚决表示谨遵合约精神，粉碎外界指私下接工作的谣言：“可能我另外一个专业系专业人士（指牙医），我从来都最重视合约精神，呢个系我唯一值得澄清嘅部分，对待我嘅工作冇唔专业嘅地方。”

Alfred今年在叱咤颁奖礼夺得男歌手金奖，在乐坛占一重要席位，在与华纳完约后，问起有否收到其他公司的邀约，Alfred笑言：“未去到邀约咁严重，始终行内人大家都有问候，都系关心话撑住我为主，我谂呢个都系做咗十几年，都可以嘉许一下自己嘅人缘。（乐小姐邀请返星梦？）乐小姐都叫睇住我大嘅经理人，都有联络同互相慰问，我都有慰问佢所有一切还好吗？始终TVB都有新嘅发展，人哋凑大我，我都需要大个去照顾人感受。”

至于日前有报导指Alfred将会沉淀半年，专注于牙医的工作，他就哭笑不得地解释：“我都唔知喺边度传出嚟，不过我重组团队的确需要一啲时间，但冇话一定系半年，其实我不嬲都做紧牙医，一直都冇停过。”回归自由身的Alfred坦言比之前更忙碌：“可能开拓咗新嘅可能性，客户嘅邀请亦都多咗，坦白讲我都估唔到大家嘅支持力度系咁大，对于我嚟讲呢啲支持紧要过模式。坦白讲，而家冇一个稳赢嘅模式；我都期待新嘅单位招手，可能有超乎大家想像嘅转向。”就如Alfred最新与强尼合拍啤酒广告，这也是大家意想不到的：“咁我都开始大个仔喇！我冇限制自己嘅可能性，亦借呢啲机会畀大家见到许廷铿嘅多啲面向。”

Alfred去到这个高度，大可安于现状，不过正如林夕的歌词所写“日日夜夜浪浪荡荡在命途里／奋力去追／要讨好哪些谁／浩浩瀚瀚顺顺利利／就算敢失去／怕要得到允许”勇于步出舒适圈后的许廷铿没有半点《慌》，反而更清楚自己接下来的路径，也希望从零开始到台湾乐坛闯荡一下：“两年前已经有呢个意向，一直都筹备紧，但因为疫情嘅关系要重整步伐，而呢件事一直都喺心入面。”他又不怕从零开始：“反而我享受重新Buildup，我唔系要带住香港固有嘅成绩、或者大家对我嘅支持去探索呢个新地方；坦白讲我之前去得好密，佢哋对于香港发生嘅事情、音乐圈都有好奇，唔系话对港星好眷恋，而家个年代已经唔系咁。”