Mr. 超出四人上限夹唔成Band　布志纶转做司机：马死咪落地行

新冠肺炎疫情持续肆虐，各行各业都面临重创，尤其娱乐表演行业更是手停口停，事关近4、5个月各大小演唱会相继取消及延期，整个行业歌手、乐手、工程人员、宣传人员等等幕前幕后都冇工开。布志纶日前在社交平台出post，写上：“Call车见到我个名唔使问，OK？”表示自己准备转行做司机，稍为八卦一点的读者都会想到，他太太家境富裕，传媒称他为“十亿驸马”，为何都要为生计烦恼？他大方回答：“呢个问题我预咗有人问嘅，其实我都咁大个人，正如大家都一样，有手有脚就希望用自己能力养活屋企人。就算我太太屋企有能力，唔代表我要摊大手板问人攞㗎。”

“有手有脚就用自己能力养活屋企人”

之前两篇“疫市下的音乐圈实况”报道中，访问过著名乐手Joey Tang，亦访问过音响工程公司老板，面对行业完全停摆他们异口同声说：“都唔知挨到几时……”身为幕前的Alan面对同样困境，只是他太太家境的关系令人觉得他“唔使挨”，但实况非然。Alan坦言：“呢个问题我预咗，我亦唔需要好激动去回答，我已经咁大个人，正如大家都一样，当你冇钱嘅时候都唔会想问阿爸阿妈攞，有手有脚嘅就用自己能力去养活自己同屋企人。就算我太太屋企有能力，唔代表我要摊大手板问人攞㗎，呢个系我由头到尾嘅生活态度。”

Alan不想做一个纯发梦的人，在Mr.休团期间他一路有发表个人作品，去年Mr.亦有举行十周年演唱会，面对关于他太太家境的问题，他反问一句：“唔通咁就可以懒懒闲咩都唔使做咩？同埋我觉得问呢个问题嘅朋友，其实香港人好唔钟意俾人标签，但系又好钟意标签人，我谂呢个问题大家要反思下。”

做过侍应、装修就算做司机都冇所谓：马死咪落地行啰　

Alan早前在社交网站出post表示自己准备转行做司机，他坦言这段时间从事音乐行业非常艰难，他亦在寻觅收入来源，反正自己也是有车，“马死落地行”做司机也没有所谓。他说：“之前喺IG都分享过，我餐厅侍应、装修又做过，喺唱片公司做过，唱片铺打杂都做过，我成日觉得马死落地行㗎啫，咁自己有手有脚，做得几多咪尽做啰冇乜所谓㗎。”至于会否仿佛Carpool Karaoke唱下歌，他笑言：“咁应该点样向你收费好呢？哈哈！”他续说：“如果喺疫情入面，能力范围做到嘅，都想可以为大家带嚟快乐嘅感觉，喺呢个感觉绝望嘅情况下带啲希望俾人。”