【ASMR】Ian陈卓贤女友视觉扮公仔氹你训 耳边唱歌冧到骨痹！
近日Ian陈卓贤推出新歌《正式开始》，以女友视觉MV杀死唔少粉丝。今日“01众乐迷”亦为大家带嚟福利！如果Ian系你男朋友，一日24小时到底会点过？“飘飘贤”亲身以ASMR方式示范女友生理期可以点做、嬲猪又有咩法宝氹返你？最重要系，你一定未听过Ian喺你耳仔边唱歌氹你瞓！听完之后个人真系会成身“飘飘然”，你又愿唔愿意同Ian《正式开始》呢？即刻睇片！
统筹：潘诺儿
拍摄：詹郭敏、吕志豪
剪接：黄卓敏
摄影：陈顺祯
点击大图睇更多幕后花絮
乐坛生涯“正式开始”
经历了一年乐坛新人“蜜月期”，Ian陈卓贤的音乐生涯在今年可说是正式开始。他透露今年会比去年更勤力：“连埋《正式开始》，希望今年可以推出3至4首歌，因为由年头已经开始准备，时间更充足。上年由年中先开始创作，所以只能够推出两首歌。”
记得Ian曾经表示以创作歌手为目标，不过今年打头阵的《正式开始》却是由Cousin Fung为他作曲，Ian解释为何今次没有参与创作部份：“《正式开始》系Edward Chan负责监制，其实Edward喺我身上已经有一个好好嘅计划，佢都同我讲，要做创作歌手其实唔急于一时，亦唔需要每首歌由自己操刀。加上Cousin写嘅呢首歌大家都觉得好适合我，所以就交到我手上。”他续道：“嚟紧下一首歌系由我亲自作曲，Demo已经交咗畀监制，倾紧点样编曲。我都觉得Edward讲得啱，当我唱多啲其他人作曲嘅作品，对我往后创作都有好大帮助，可以尝试唔同嘅曲风。”Ian又透露：“除咗作曲畀自己，今年都将会作曲畀其他歌手，我最大嘅心愿系希望终有一日可以写歌畀林宥嘉。”
《全民造星II》后浪快速追上 最欣赏嘅选手系？
除了完结乐坛新人的生涯，去年ViuTV亦已完成了《全民造星II》的节目，后浪来得快，对Ian这年资尚轻的音乐人来说少不免是种压力，不过他却保持正面乐观：“我自己嘅心态系任何时候都要加速，姑勿论有冇后浪嘅出现，其实当我游咗出乐坛呢个公海，乐迷观众自然会将我摆埋同咁多位乐坛前辈一齐比较。以我为例，其实我由细个开始系打排球，去到好后期先接触音乐，所以我觉得自己失去好多时间，要加紧脚步先可以追上其他人一早准备好嘅状态。”
提到他欣赏哪位《全民造星II》的选手，他则表示自己非常喜欢Justin陈乐：“因为佢好有音乐才华，只得18、9岁，心态上仲系一个小朋友，所以同佢相处都好轻松、好搞笑。虽然我同佢之前都系Team B，但由于分组唔同，所以一路都比较少交流，直至有一次分到我哋合作，同佢倾计就发觉大家钟意嘅音乐都好相近，加上佢性格好讨好，所以特别欣赏佢。”