曾乐彤成本年度新人奖大热　推出处女EP瞓身影封套

年尾乐坛颁奖礼进入倒数阶段，歌手们都争相努力作最后冲刺，今年焦点女新人之一曾乐彤，由Youtuber变身做歌手，呢日推出首张个人EP《#meme》，原来碟名亦系网络用语，有网络爆红事物嘅意思。除咗说明曾乐彤打从一开始Youtuber身分引起关注外，仲有另一种含义，曾乐彤：“碟名拆开读就由两个 “me”组成，暗喻我唔止得一个面向，可能之前我做YouTuber到宜家做幕前俾人感觉有落差，咁究竟边一个先系我呢？其实无答案，可能两个都系呢！至于封套辑相，就玩同一个造型用两种截然不同的感觉呈现，有跳脱，有严肃，又有无厘头，但无论咩风格都系我。”

拍摄唱片封套时大部姿势都需要瞓地，曾乐彤笑言连汗都唔留多滴，怕水肿所以连水都唔敢饮，但辛苦系有回报：“我自问对影相系有要求，今次辑相净睇萤幕已经满意到可以直接出，唔驶修图超厉害！”除咗典型chok样外，摄影师仲特意捕捉曾乐彤未入状态前呆滞或大笑look，加埋插画之后，古怪的配搭竟然零违和，完全切合佢认真地搞笑的本质。而当摄影师叫曾乐彤摆出自然的姿势，无论著裙定著裤佢都毫无顾忌地擘脚，又或者单手做掌上压，份外投入确实娱乐到一班工作人员，大赞佢除左识影靓相，仲有本事驾驭“骑呢造型”，呢种喜感、百变同无包袱，将会系佢做娱乐圈一项强大本钱。

曾乐彤又谓即使初入行都知唱片业不景气，对于公司还会出资为自己出碟，心存感恩:“听都听得多实体碟市场不断萎缩，但做一张唱片要投放嘅资源同心机真系好多，好多谢公司，作为人生其中一项履历，我觉得好幸运。”咁问到会唔会对销量感压力，佢补充到因为一张碟除了当作商品，亦算是2018年小总结，本身已经有纪念价值，对比起销量，反而更著重外界对专辑封套同第四首新歌《我我》的反应，始终下左唔少苦功。问出碟后有任何大计，佢立即笑到：“今年公司向我身上投资唔少，希望之后帮公司赚翻多啲呀！”