BOYZ重拍《跟踪你》MV　关智斌张致恒15年后变咗几多？

撰文： 洪晓璇
出版：更新：

所谓往事不堪回首，今时今日要大家睇返5年前嘅旧照，见到想当年嘅衣著打扮已经相当无眼睇。BOYZ相隔多年Re-U，演唱会门票话咁快秒杀售罄，入场前温书听返旧歌已经系指定动作，BOYZ相当有心，重新拍摄经典歌曲《跟踪你》MV，网友惊觉事隔15年关智斌完全无变老，好似仲靓仔咗添呀﹗

BOYZ重组后，第一件事就系重拍经典歌《跟踪你》MV。（影片截图）

其实原装MV讲嘅系一个暗恋女仔嘅故事，BOYZ跟踪佢哋暗恋嘅女仔，暗地裹对佢呵护备至，成个MV又sweet又冧猪。当年女主角系梁洛施，隔咗15年后新版女主角就揾咗佢地同门师妹许靖韵（Angela）演出，点知睇睇吓就发现变咗“痴汉版”。

MV女主角当年系梁洛施，嚟到2018年版本就变咗小背心许靖韵。

Angela反跟踪BOYZ，又戴假发又盛，扮鬼扮马跟踪佢哋两个，无论喺CD舖、小巴、戏院，无时无刻都喺佢哋身边出现，搞到Kenny同Steven劲惊，最后BOYZ忍唔住当面走去问Angela做乜跟踪佢哋几日，原来Angela系BOYZ嘅die hard fans，“你哋首首歌我都识背，𠮶首《死性不改》调转头我都识背呀！同埋咁耐冇见咪谂住见吓啰。”原来系为咗见佢哋一面，真系吓鬼死人。

事隔15年，Kenny点解可以完全无变架﹗（影片截图）
Steven就好似佬味浓咗少少……（影片截图）

Re-u番十五年前嘅MV，除咗发型唔同咗之外，Kenny疑似著返当年同一套歌衫，完全无老过仲好似靓仔咗﹗真系非常神奇。至于Steven就由当年嘅花美男，留住一脸胡须增添男人味，侧身望落身型仲好似阔咗唔少。佢地不约而同都话，呢次拍摄令回忆返晒嚟，Kenny话：“都真系几开心，因为同佢（Steven）一齐两个人冇乜压力，好似返返去十几年前，一齐做嘢得来又好似一齐去玩𠮶个感觉，好有呢个情怀。”佢哋仲话好多谢Angela帮手拍呢个MV，“佢虽然冇原版嘅女主角咁温柔，但系佢𠮶种傻劲系带出咗另一种诡异嘅感觉，哈哈。第一次同小师妹合作，希望再有多啲机会同佢一齐做嘢，我哋真系好钟意佢，佢真系好得意。”

Kenny同Steven大赞Angela相当用心，专业又准时，揣摩咗呢个角色，特登拎个假发出嚟拍摄。

一齐睇下有几咁神还原吖

+4