入行以来最爱《Creo en Mi》MV　郑秀文：有我想要嘅电影感！

郑秀文（Sammi）今日在铜锣湾举行新歌《Creo en Mi》的MV首播会，吸引大批粉丝到场支持。除了同现场一班歌迷一齐见证首播之外，今次的MV还会在铜锣湾某百货公司外的大荧幕上同步播放，Sammi也表现得相当兴奋：“我好期待今日，因为平时睇最多咪大电视，但就未试过呢啲大嘅荧幕啰。同埋觉得呢两只歌嘅画面都好适合喺咁大嘅荧幕播放，因为个震撼力同感染力好强。”

新歌《Creo en Mi》是一只来自西班牙的歌曲，意为相信自己，Sammi透露她听了几百次之后，决心要拣这首歌，当中的Rap的部分就揾来Jackson王嘉尔：“初初都系试下啦，第一佢好忙，第二因为佢主力都系唱英文歌，我唔知佢会唔会再有兴趣唱下广东话嘅歌，点知佢听咗只demo之后就钟意呢只歌，好快回复话：‘可以可以，合唱’咁仲要有心extra再为呢只歌创造咗啲melody喺里边，再有诚意啲，佢再同佢嘅团队再做多一个remix版，咁我谂佢真系好钟意呢只歌，所以我feel到佢好投入。”虽然两人素未谋面，不过配合得相当默契，Jackson还送上短片祝贺Sammi，令她非常感动。

今次的MV由Sammi和70位演员合力演出，场面震撼，她看完之后也很感触，搞到眼湿湿添，还笑言“拍电影都冇咁多人”。其实今次的拍摄过程相当辛苦，Sammi在人群中被推来推去之余，更跪低被人“淋红油”，搞到啲“油”入晒口耳眼鼻，不过她却不以为然：“辛苦都系其次啦，我能够一步步实践自己心里边嘅idea，同埋个团队好帮到手，可以话不惜工本，我自己好开心啰，人力啦、物力啦，又有好多金钱嘅投资啦，因为自己好耐都未试过做一只广东歌可以有咁多人力、物力嘅资源，摆喺一个广东歌嘅MV里面。”

Sammi坦言完成呢只MV就好似带著一个使命感做咗一啲嘢：“谂返成件事点样去由一开始一个idea，咁又邀请咗Jackson，攞到呢只歌个Right，跟住开无数次嘅会，处理咗好多唔同嘅问题，最终完成到，我好开心。”投入那么多心血，难怪Sammi也称这是自己入行以来最钟意的MV：“因为我觉得真系做到我好想有嘅电影感，第二佢有一定嘅故事性喺度，唔复杂但系有个完整性，同埋个故事都好合情合理，我同导演讲我唔想一开始成个MV就好似好光明，我想有一啲人性嘅黑暗喺入边，咁所以佢就揾咗几十个群众演员，一齐去营造一种慌乱、混乱、迷失嘅感觉啰，咁慢慢喺个黑暗里面，因为相信自己呢个信念，再揾返自己，我觉得成个意念好好，所以我好钟意。”