张敬轩深夜开Live放催泪弹　为患癌歌迷集气：音乐系佢止痛剂！

张敬轩昨日担任陈柏宇红馆个唱嘉宾，两位“行走的CD”合唱《骚灵情歌》为乐迷送上惊喜，而轩仔亦有独唱《樱花树下》，令各位入场的乐迷都大饱耳福。看来轩仔知道大家意犹未尽，昨夜做完嘉宾回家再开Live，除了唱出乐迷的点唱歌，又与大家分享心中的想法，来一个深夜pillow talk。

昨晚轩仔开Live有求必应，唱出《念亲恩》、《寂寞的男人》、《傻女》、《尘埃落定》、《披星戴月》、《偏偏喜欢你》等等歌曲后，轩仔再与大家分享一些心事：“人一到夜晚就好脆弱，千愁万绪。”

轩仔眼湿湿地提到今年是不容易过的一年，先是年头发生一段小插曲(《我是歌手》事件)，加上家中宠物抱病及离世，令他工作状态不太好。轩仔话：“希望大家原谅我一啲演出、工作唔状态唔好，因为喺我屋企小动物同人系平等嘅。可能对一啲人嚟讲只系一只狗仔病咗，但对我嚟讲佢系屋企人。”

轩仔又提到照顾家中宠物时投放了很多心力：“我只猫女离开之后，到我只狗仔唔行得，由最初谂住点都要救番佢，试咗好多方法同用好多药，由仲有一丝希望，到医生话佢唔会再企番起身，过程中经历咗好多情感。”忆述家中宠物抱病时轩仔都一脸愁容。

除了宠物身体抱恙，年头发生的《我是歌手》事件令轩仔与家人很大困扰，令他感触地说：“你哋冇办法想像我父母𠮶阵时面对嘅困扰，作为公众人物有好多时福系自己享，荣耀系自己攞嘅，但系唔好嘅事情都系屋企人去承受。有啲新闻我哋识得去拆，识得去回答，但系佢哋唔识。”加上轩仔父母在广州居住，要面对的问题不比轩仔少：“特别佢哋住喺广州，一啲八卦杂志用嘅字眼比香港嘅杂志更难睇，更加harsh；我一有新闻𠮶阵，佢哋要面对其他人点样睇佢哋。”

家人及宠物以外，还有一位患癌歌迷的经历令轩仔感触良多，他以“震撼”来形容：“最近我有位经常见面嘅朋友，佢系我一位歌迷，因为癌症要截肢、接受化疗，我有同佢见面，一齐唱下歌练下歌，最近同佢相处系好震撼。”

轩仔续道：“通过同呢个男仔相处，我发现生命当中有更多比post一个instagram或者上社交网站更重要嘅事去做。佢嚟过我录音室两次，见到佢对音乐嘅热诚系好震撼，佢妈咪话佢全身都好痛；但系佢一入到录音室，一开咪唱歌，每次问佢有冇唔舒服，佢都话冇问题。”轩仔眼泛泪光话：“对于我喺呢个行业入面做咗咁耐嘅人，有时音乐已经系一份工作，但系音乐对于佢嚟系吗啡，系佢嘅止痛剂！当佢辛苦唔舒服嘅时候，只有唱歌同音乐可以帮到佢。”轩仔更呼吁昨晚睇live的4千多位观众能为这男孩祈祷。

虽然轩仔这一年面对各方面的挫折，但伤痛过后他视之为宝贵的一课：“虽然今年去唔成外国读书，但系都上咗好多宝贵嘅一课。好感恩当一啲门关起咗，另一啲门会打开，透过认识不同嘅人学到新嘢；事情过后会更明白自己要坚持咩嘢。其实我哋都系普通人，都会伤心、寂寞，同你哋嘅感受都一样。不过我更加揾到我嘅价值，就系做多啲可以打动人心嘅歌，可以陪住你哋渡过生活上嘅难关。”