农夫“乐坛末日论”笑中带泪：而家无人知道本周冠军歌系乜

昨晚《农夫等钱洗世界巡回演唱会》正式结幕，整场骚在一片掌声当中渡过。一如农夫的风格，你说它是一个演唱会，它却不失栋笃笑的特色，你说它是一个栋笃笑？它又确确实实是一个演唱会。全场不乏感动位，唱到《重新找到你》及“成长三部曲”时，台下观众也眼湿湿，最尾唱到《456Wing》及《举高只手》时，却连陆永也禁不著眼泛泪光。但要数到全晚令人笑到咳的，一定要讲到农夫于台上大爆的“乐坛末日论”。

农夫二人在台上提到，曾经有记者朋友问起他们：“到底你们觉得农夫是站在乐坛什么位置？”此问一出，可说是震惊了他们二人，C君道：“呢个问题就好似而家世界末日，你问我系站喺地球咩位置一样。”不过当然有粉丝大叫：“你哋系第一位！系乐坛嘅顶峰！”此言一出，不禁令二人自嘲：“如果在座有啲朋友想加入乐坛，而我哋系第一嘅榜样，佢哋即刻唔嚟啦！坤哥仲做唔做好呀以后？咁样系第一？”农夫二人立刻与在场观众做一个小测试，以测试出乐坛到底还是否存在，他们问台下观众：“有冇知道今个星期嘅冠军歌系咩？”台下先是一片安静，然后再次笑起来，二人续道：“我哋做咗六场，都系得一个观众答到！佢仲要系即刻上网揾先知道！即系无人听过呢个星期嘅冠军歌，甚至年尾嘅冠军歌你都未必听过啦！所以而家呢个乐坛嘅趋势就系，你有听过冠军歌，系等于你有见过UFO！”

农夫笑说乐迷大致分三类：“一种系极极极少数真系有见过UFO，第二系以为自己见过UFO，而第三就系好似我哋咁，扮见过UFO。”他们更开坤哥玩笑：“即系当坤哥问我哋‘有冇听我新歌呀？’我哋会答‘好呀！好正呀啲arrangement我觉得，好用心！个歌名都好呀！《孝义》…呀唔系，系《孝顺》呀嘛！差唔多啦！’”

二人更以乐坛年尾颁奖礼打比喻：“而家听过冠军歌，的确就好似见过UFO，所以可能嚟未来几年，最适合做乐坛颁奖礼主持嘅会系夏韶声同埋云海。同埋会相当有娱乐性。”C君更即场饰演夏爷作示范：“大家好我系Danny Summer，今年嘅冠军歌，系真系有人听过…嗱唔系我讲㗎！系有五个“陈仔”(外星人)听过。而呢五个“陈仔”，都系有份写呢只歌㗎。”C君更笑说：“佢仲成日话唔系佢讲㖞，明明全部嘢都系佢讲。”

而陆永立刻云海上身接著说：“要讲返呢只歌呢，就要讲返2017年6月23号，下昼3点33分，确实系有一班歌手去过电台做访问㗎！录低晒㗎！而最吊诡嘅系，啲人当冇听过咋！”

不过除了夏爷与云海，他们更恶搞玄学家苏民峰：“大家如果遇到啲游魂野曲唔洗咁惊㗎㖞！原来都有解决方法嘅！大家可以喺屋企嘅五鬼位𠮶度放部CD机，咁就可以收咗啲游魂野曲啦㖞！”

陆永又恶搞另一位玄学家龙哥：“其实龙哥平时唔会好似上电视咁乾坤一开，佢平时口头禅都系比较低调。”陆永又立刻换上龙哥身份说：“你喺度经过见到有个坛…个乐坛，里面会有五男四女，你睇唔到佢，唔代表佢唔存在㗎，𠮶啲歌手嚟㗎…大家行开行埋，有缘份咪帮吓佢啰。”

讲吓讲吓，他们又把话题带回自己身上：“讲返一开头个问题，到底我哋企系乐坛嘅咩位置。我哋都收过一个评语，其实一直都有人咁讲，佢哋话农夫𠮶啲Rap唔系Rap嚟，只系讲嘢有节奏同押韵。我对呢个评语好深刻，其实有一个年代，连金庸先生写嘅武侠小说，都比人话武侠小说唔系文学嚟嘅；好多漫画家都比人话漫画唔系艺术；新诗都曾经比人话，新诗唔系诗嚟。每个年代都有佢嘅准则，而时代都行得好快，可能有一日，通街都系自动车无人驾驶，反而有个人揸住架棍波车走出嚟话‘呢啲先系车嚟嘛’；可能有一日，电子货币全球通行，又有人揸住张十蚊纸走出嚟讲‘呢啲先系钱嚟嘛！’；而家成日预言话AI会取代人类，如果有一日真系发生咗，一定又有啲血肉之驱走出嚟话‘呢啲先系人类嚟’；又可能有一日，或者在座其中嘅一位会攞住农夫嘅CD出嚟讲‘呢啲先系Rap嚟㗎嘛！’”随即引起全场欢呼。

接受后台访问时，农夫表示相当喜欢旺角麦花臣这种规模的演唱会，即使将来有机会再开红馆也不一定会考虑：“其实对上一次，七年前开红馆，我哋觉得红馆系比一啲好巨星嘅人去做，我哋就适合做呢类同观众接近啲嘅场地。始终红馆太大，我哋又钟意同乐迷有互动，所以都系呢类场地先做到。”问到曲风方面，由《456Wing》这类开开心心的歌，再到《重新找到你》的成长题材，乐迷好像跟著农夫一起长大，而“成长三部曲”亦令乐迷非常受落，到底农夫会否继续写以“成长”为题的歌曲？他们坦言：“绝对冇啦，成长我哋都做咗四五部曲啦，再做都可能生活化小小嘅题目。如果要再写成长嘅时候，可能要过多十年，我哋都觉得自己真系成长咗先会谂，到时可能系追悼农夫。”