农夫演唱会有子华神做嘉宾？　C君：好难讲俾你知㖞

撰文： 黄梓恒
出版：更新：
仲有一个月就开骚喇。（Facebook图片）

农夫事隔多年终于再开演唱会，热烈程度实在始料不及，一开头怕反应唔好，拣喺旺角麦花臣呢个细场开，点知啲飞卖到断晒市，已经确定会加开两场。见到反应咁好当然好开心喇，所以农夫都一定会努力回报粉丝，除咗会落力演出之外，可能仲有特别惊喜添㖞。事关今日他们就在网上post了一张同DoDo姐加埋黄子华嘅合照，以佢哋同DoDo姐嘅关系，要请到佢撑场绝对唔难，不过可以请埋子华神，就真系好惊喜喇！

估唔到子华神都请到出嚟。（Facebook图片）

虽然摆晒合照咁，不过又未必真系会做嘉宾，《香港01》就立即找来C君问一问，他说：“好难讲俾你知㖞，叫到佢嚟睇已经好荣幸，总之两位非常帮手啦！”卖晒关子咁㖞，但就算子华神唔系做嘉宾，可能只系睇吓彩排俾吓意见，一定令农夫两个获益良多喇。

佢两个都好落力宣传。（Facebook图片）

农夫跟DoDo姐自从《Do姐有问题》之后，就一直都合作无间，他们的节目被观众认为抵死搞笑得嚟又轻松，完全唔做作，所以间接亦令农夫得到唔少粉丝。而子华神跟DoDo姐在《男亲女爱》合作完后一直都是好好的朋友，加上农夫不只一次提及子华神是自己的偶像，可能今次出尽人情牌，请DoDo姐邀请子华神来俾吓意见。虽然未肯定会唔会做嘉宾，不过如果真系有呢个机会，相信唔好话系麦花臣开 6场，可能红馆开6场都爆呀！

农夫同Do姐嘅节目真系好好笑。（电视画面）