【任噏乐评】农夫《返工咁辛苦为咩》太写实　刺痛打工仔惹负评？

一提本地Hip Hop组合农夫，可能大家都会谂起“玲玲出嚟又睇掌喇！”呢啲入屋又搞笑嘅作品，但一直有留意开农夫的乐迷都会知道，嘻嘻哈哈只系表面𠮶浸，底蕴里仲有好多认真、贴地嘅作品，好似《粒粒皆辛苦》、《问题儿童》、《伟大航道》等等，听完包你眼湿湿笑唔出。

歌曲道出打工仔人浮于事，为跑数，为上车，为追赶不同目标而错过人生重要事情的遗憾，不论任何年纪、身份、职业同样都会有共鸣，呢个就系农夫嘅魅力。

边首农夫嘅歌最打动到你？

近一、两年农夫以幕前演出为主，作品都好似跌咗Watt，冇咗之前𠮶种“入心入肺”，变到有啲距离。不过农夫即将开演唱会，仲出新歌《返工咁辛苦为咩》，一睇个歌名相信好多人都会有共鸣，或者问过自己“返工咁辛苦为咩？”，有一种“六师弟返嚟喇”嘅感觉。

不过网民嘅反应就唔太受落，好多负评：“听咗你哋八年，个人觉得最差𠮶几首之一，变edm可能会好啲”、“见到首歌名想揾吓啲共鸣感，点知好失望，好差”、“我觉得不行啰，有D失望”、“俾d音乐嚟得唔得”等等。

虽然有网民觉得不行，但可能久唔久收工去饮下嘢网民会觉得OK。《返工咁辛苦为咩》歌词描写讲打工仔收工落夜场，不求享受但求买醉，为片刻逃避平日生活各方面咄咄进逼嘅压力。有网民嫌太嘈，但其实音乐底将夜场环境“如实反映”，因为一入门口你只会听到“砰砰砰”嘅低音不断轰向你耳仔，唔会听得出间Club播咩歌，就好似《返》曲入面震耳欲聋嘅鼓声一样。

再者，有网民指歌曲冇共鸣，只可以讲句“少年你太年轻”。《返》曲中每句歌词都可以话系“指定对白”，有陪过朋友落酒吧嘅读者一定听过。

觉得冇共鸣嘅网民可以睇以下文字想像下：

阿明每日OT冇补水，一星期返足七日都只系得万二蚊一个月，落到嚟第一句就同你呻：“返工咁辛苦为咩！”

坐喺侧边，住上水嘅阿强每朝8点要到中环返工，佢同阿明一齐吐苦水：“日日返到只狗咁，仲早过啲鸡起身！”

平时唔饮得嘅阿伟两杯到肚之后，开始自言自语：“供楼又系你嘅，水电煤又系你嘅，个单位又细，管理费又贵，仲要交税！”

个个都放负，你都冇晒计，唯有大嗌：“饮就饮胜啦！将受过嘅气一次过Er出嚟！”

其实所谓嘅贴地题材唔系下下都要同你讲人生、讲追梦、讲社会大事，《返工咁辛苦为咩》都好贴地。可能有人觉得个音乐底一味轰，陆永C君又一轮嘴唔知讲紧乜，但好多打工仔每晚落去饮酒，就系为咗呢逃避现实，为咗可以唔谂生活嘅嘢唔想醒。个个都饮到呕，个个都真系想饮到呕咩？有出路、有目标、有方向就唔使晚晚落去饮啦。

讲到尾，听歌从来都好主观，始于人人口味唔同，不过一味话唔好听嘅乐迷系因为接受唔到农夫转曲风，定系太写实令到你不想面对呢？