《全美一叮》比赛完仲有下一个　Celine妹妹到底有几辛苦？

9岁“小巨肺”Celine妹妹谭芷昀早前于《全美一叮》一鸣惊人，在美国比赛过后终于返港，今日到尖沙咀出席Cafe开幕活动。Celine在活动上大赞爸爸谭顺生靓仔，又专注整面包展现童真一面。

Celine妹妹一出场自然成为传媒焦点，面对传媒提问Celine妹妹显得有点紧张，未如比赛时淡定自信。来到9月新一个学年展开，被问到返回校园同学有何反应？Celine妹妹表示：“好开心！佢哋恭喜我啰！”又问到怕不怕跟不上进度，身旁的谭顺生开腔话：“其实佢（Celine）都有做好多功课，喺𠮶边（美国）都有做功课，都有跟，所以唔担心。”话晒Celine只得9岁，仍然系求学阶段，今次远赴美国参赛请咗几多日假？谭顺生都唔肯定话：“前前后后两星期左右啦，都有十几日。”其实又要远赴美国比赛，又要做功课，返嚟香港仲要追学校进度，Celine妹妹都几辛苦㖞！

两个礼拜对成年人嚟讲可能返下工眨下眼就唔见咗，但对只得9岁嘅Celine嚟讲就系两回事。虽然话跟得上进度，但系两个星期老师都唔知讲咗几多课书，同学又会一齐开心玩游戏做劳作，呢啲童年时光真系做几多本作业都补唔番。可能你会话Celine会有一般小朋友冇嘅经验，但同样Celine嘅童年变成只得舞台而缺少了校园。难怪Celine面对传媒提问都话：“我想同朋友一齐多啲。以前冇乜时间同同学一齐返学，依家想返下学先。”

不过谭顺生表示希望丰富Celine嘅Experience，所以过几个月Celine又会参加不同比赛。Celine话：“过多几个月可能会，我自己都钟意参加比赛。”那边厢话想重返校园，这边厢又话钟意比赛，唯有希望Celine身心能够应付。

Celine Dion本尊公开在Twitter大赞Celine，又邀请Celine到拉斯维加斯同台演出，咁谭顺生同Celine系咪真系应邀？谭顺生则表示：“交畀经理人处理。”另外，被问到骚价有冇因而上升，会否作更多幕前演出，谭顺生为Celine挡驾，一概以“交畀经理人处理”回应。