【任噏乐评】ToNick变第二队Dear Jane？　情歌够入屋先有运行

乐队ToNick唔经唔觉喺香港乐坛已活跃了近10年，早期歌曲以Pop Punk风格唱出热血、追梦，十足后生仔够火一味冲。ToNick作品以广东话口语入词，甚至会加入俚语、粗口，得闲又会抽时事水，够晒亲民贴地。而且主音恒仔唱Live经常与观众互动，炒热气氛冇难度，再配合ToNick本身歌曲旋律够易记琅琅上口，喺大场开show千人大合唱不是梦。因此ToNick深受年轻乐迷欢迎，因为钟意佢哋“咩都够胆死”。

ToNick系本地Band Show常客，因为有佢哋气氛一定好，差唔多每次喺蒲吧开show都令观众跳到成身汗，大嗌“开大啲个冷气呀！”睇得ToNick点只跳咁简单，“插水”（Stage Dive）系指定动作，2011年喺九展开《发你个音乐祭》有fans Cosplay动漫人物上台插水，台上台下都玩到癫，仲要有片为证，斋睇片你都觉得High，睇Show系咁先对路㗎嘛！

ToNick愈嚟愈多发展，除咗夹Band出Show又做埋节目主持，主音恒仔更执导电影《救僵清道夫》，ToNick包办埋电影主题曲《长相厮守》。《长相厮守》一改以往风格，由以往有火的热血青年变成情歌王子，而编曲也有点五月天的感觉，加入弦乐让人有感动到起鸡皮的感觉。《长相厮守》易入口，又有电影加持，所以成绩非常好，喺YouTube至今有过5百万点击，又成为两台冠军歌，可以话系ToNick第一次咁好成绩。

作为乐迷见到ToNick愈嚟愈入屋当然开心啦，不过我想听番以前嘅ToNick多啲。

唔知系咪因为《长相厮守》成绩好所以食住条水，新歌《回忆备份》、《阿飞与阿基》都系行柔情路线，有啲似爸爸说教mode循循善诱，教大家要珍惜，活在当下行好人生每一步。写感动、励志、正能量作品其实冇问题，唔通下下都悲天悯人、愤世嫉俗咩？不过太多修饰，每样嘢都编到咁靓，略嫌有啲“唔够Real”。感觉就似Dear Jane由以前唱《男儿当打交》变成依家唱《不许你注定一人》一样，其实啲歌系好听㗎，不过硬系唔系好啱数咁。

网民对于ToNick风格转变都话：“讲真，要靠啲MK歌先Hit，阴功”、“ToNick靠呢首先红到真系几可悲”、“证明个市场几变态”、“感觉上ToNick已经变咗质，都几失望”等等。

新歌《回忆备份》MV都有网民留言：“比较喜欢从前风格，别迎合听众口味，做回自己，这首歌太没你们风格”、“我比较喜欢以前嘅ToNick”。

乐队转风格然后一班老fans出嚟指指点点话“变到Pop晒”，“唱情歌做乜嘢？”系老是常出现嘅情况，但系不无道理。当初班fans就系因为乐队嘅第一印象吸引到佢，俾到主流以外嘅声音佢听，题材能够脱离流行曲套路讲一啲贴地嘅嘢，先系可贵嘅地方。相反，为咗入屋改变风格，的确可以吸纳到新嘅听众，但一直追随嘅fans难免会反感，因为要听大路嘢打开电视揿去TVB就大把有得听啦，点解要走去听Band，仲要俾人话“扮小众、扮有品味”先？

虽然话人有好多面向，经历多咗心态会有唔同，写出嚟嘅歌自然都唔同；但昔日唱过“我穷我有风格 我唔做跟班鸭”，今日都变成跟住市场走，感觉上好似俾人呃咗10年咁。