G.E.M.第5次踏红馆舞台忆往事 　“畀心爱嘅人伤害令我好心伤”

G.E.M.《Queen of Hearts世界巡回演唱会》香港站昨晚于红馆完成首晚演出，除了大热作品《泡沫》、《光年之外》、《A.I.N.Y.》等，亦有不少改编作品，包括改编《Eyes Nose Lips》的《红蔷薇白玫瑰》、《约定》、《让我跟你走》、《每天爱你多一些》等等。

作为实力派歌手，G.E.M.在演唱会中也是多唱歌，少说话，让乐迷一饱耳褔。演唱会来到下半场，身穿一袭白色长裙的G.E.M.终于有返啲女神feel，她更分享了一个故事：“今晚主题系《Queen of Hearts》，不如分享一下关于爱嘅故事。我对爱有一个好不切实际嘅幻想，就系要日日好似拍戏咁，要轰轰烈烈、山盟海誓，但到大个真系拍拖嘅时候，就会发现爱唔系咁样，有一段时间我系好心伤，尤其系当你畀心爱嘅人伤害，付出好多嘢但最后徒劳无功，如果你未试过，我恭喜你，你好快会尝试到呢种滋味。有一首歌我早两年作嘅时候无谂咁多，最近听返我谂起我公公，公公以前每次嚟香港都会同婆婆一齐嚟，但婆婆喺6年前走咗，我就喺度谂，到底公公呢6年系点㗎呢？我问起佢，佢就话净系谂婆婆好嘅嘢啰，闹佢𠮶啲佢唔谂㗎。我望住公公嘅眼神就明白，原来真系爱一个人嘅时候，佢唔需要经常喺你身边，但无论佢喺几远嘅地方，你心目中永远都会留低佢好𠮶一面。”然后便唱出《多远也要在一起》。

唱完《多远也要在一起》后，一位男粉丝为G.E.M.送上108支红白玫瑰，吓得她当场反应不来，更一度以为男粉丝想让她把玫瑰转送给其他女生。G.E.M.禁不着问：“咁你呢扎花系做咩㗎？真系送畀我㗎？”男粉丝则示意向G.E.M.求婚，G.E.M.既惊且喜说道：“我咁大个女都系第一次畀人求婚，我呢一刻都唔知要畀啲咩反应好。”男粉丝随即送上一个粉红色箱，工作人员帮G.E.M.打开时，她紧张得大叫：“呢个要留畀我开㗎！”并谓：“到底会系咩嚟呢？唔通系冰皮月饼？”打开箱盖，看见红色一团，不少观众大叫：“婚纱！”不过原来是迎合《Queen of Hearts》主题的红裙，胸口位置更是开得相当“疏爽”，令全场观众拍掌叫好。而G.E.M.则尴尬表示：“多谢你，我今晚返去会好好考虑一下你嘅要求。”

除了有华丽的钢琴自弹自唱外，G.E.M.更排出一套气势十足的鼓，功架十足的独奏了一段。快歌时段开始，《新的心跳》、《See You Again》在重新编曲下相当Groovy。最后G.E.M.更以一段《Get Everybody Moving》介绍幕后团队，包括Lupo Groinig在内的乐队成员全是外国乐手，编曲绝对有国际水准，实在要赞。不过才刚High起来，G.E.M.便与观众道别。

可能你会话：“吓？咁就完㗎啦？真系得一首自家嘅广东歌唔够喉㖞？”阿G.E.M.实在非当鬼马，原来她把大部分广东歌也放在Encore位置，听到《Where Did U Go》、《All About You》，终于有一种G.E.M.演唱会正式开始的感觉！最后都总算交足货《喜欢你》、《睡公主》、《有心人》，一连串广东作品实在系令香港乐迷回忆返晒嚟！G.E.M.在完场时感触道：“我已经系第5次喺红馆开演唱会，我喺呢个舞台上面经历过好多嘢，我试过呢头失恋另一头喺呢度开骚，我试过第一次有1万人同我喺呢度一齐祈祷。有一个人我一定要趁今日嘅机会去多谢，因为佢令当日嘅睡公主成长为今日嘅Queen of Hearts，多谢呢位King of Hearts，我嘅上帝。”